शिर्डी परिक्रमा उपक्रमाच्या नियोजनासाठी आयोजित एका कार्यक्रमात सुजय विखे पाटील यांनी संस्थानच्या अधिकाऱ्यांसमक्ष शिर्डीला येणाऱ्यांना २५ रुपये आकारावे आणि त्यातून येणाऱ्या पैशातून शिक्षणासाठी खर्च करावा, अशी मागणी केली. सुजय विखे म्हणाले, ‘शिर्डी संस्थानतर्फे मोफत जेवण दिले जाते. अख्खा देश येथे येऊन मोफत जेवण करतो. महाराष्ट्रातील भिकारीही येथे जमा झाले आहेत. खरे तर शिर्डीला येणाऱ्यांना २५ रुपये देऊन जेवण करणे परवडणारे आहे. त्यानुसार शुल्क आकारण्याचा निर्णय घ्यावा. वाचलेला हा पैसा शिक्षणासाठी खर्च करा.’
‘अख्खा देश शिर्डीत येऊन फुकट जेवतोय, तर महाराष्टातील सगळे भिकारी…’ सुजय विखे असे का म्हणाले?
‘शिर्डीतील मुलांना दर्जेदार शिक्षण मिळाले पाहिजे. त्यांच्या भविष्याची तयारी करून घेता आली पाहिजे. केवळ शाळांच्या इमारती चांगल्या बांधून जमणार नाही. तेथे चांगले शिक्षक आणण्यासाठी खर्च करा. इंग्रजीचे शिक्षक जर मराठीतून इंग्रजी विषय शिकवित असतील तर काय उपयोग? जे पैसे अन्नदानासाठी खर्च होतात ते पैसे आमच्या मुला-मुलींच्या भविष्यासाठी, शिक्षणासाठी खर्च करा. तुम्ही निर्णय घ्या, कोणी या विरोधात आंदोलन केले तर त्यांचे काय करायचे ते पाहू.’ असेही विखेंनी नमूद केले होते.

यावर स्पष्टीकरण देताना राधाकृष्ण विखे पाटील म्हणाले, ‘सुजय विखे यांच्या शब्दाचा विपर्यास केला गेला आहे. भिक्षेकऱ्यांचा अवमान करण्याचा त्यांचा हेतू नव्हता. मात्र मध्यंतरी भिक्षेकऱ्यांचा प्रश्न फार गंभीर झाला होता. स्थानिक ग्रामस्थांना आंदोलन करावे लागले. सुजय विखेंनी जो शब्द वापरला त्यामुळे भावना दुखावल्या असतील. हे मी मान्य करतो. मात्र भावना दुखावण्याचा त्यांचा हेतू नव्हता,’ असे राधाकृष्ण विखे पाटील म्हणाले.