नेमके प्रकरण काय?
मिळालेल्या माहितीनुसार, महेश डामसे असं मृत तरुणाचं नाव आहे. त्याचं गावातील एका कॉलेजमध्ये शिकणाऱ्या तरुणीवर एकतर्फी प्रेम होतं. काही दिवसांपूर्वी त्याने त्या तरुणीकडे लग्नाचा प्रस्ताव ठेवला होता. पण तरुणीने त्याला स्पष्ट नकार दिला. याच गोष्टीचा राग मनात धरून महेश संतापलेला होता, असं सांगितलं जात आहे.

कोयत्याने केले तरुणीवर वार
बुधवारी सकाळी तरुणी जुन्नरमधील आदिवासी मुलींच्या शासकीय वस्तीगृहातून कॉलेजला जाण्यासाठी बाहेर पडली. तेवढ्यात वस्तीगृहाजवळच थांबून बसलेला महेश तिच्या समोर आला. काही बोलणं होण्याआधीच त्याने हातातल्या कोयत्याने तिच्या डोक्यावर आणि चेहऱ्यावर सपासप वार केले. अचानक झालेल्या या हल्ल्यामुळे तरुणी रक्ताच्या थारोळ्यात कोसळली. आसपासच्या लोकांनी तिला तातडीने रुग्णालयात दाखल केलं.

जंगलात आढळला मृतदेह
एकतर्फी प्रेमातून तरुणीवर हल्ला केल्यानंतर महेश तिथून पळून गेला. पोलिसांनी लगेच शोधमोहीम सुरू केली. रात्री उशिरापर्यंत जंगल परिसरात त्याचा शोध सुरू होता. मात्र दुसऱ्या दिवशी सकाळी जवळच्या टेकडीवर त्याची दुचाकी सापडली. पोलिसांनी परिसरात शोध घेतला असता थोड्याच अंतरावर एका झाडाला गळफास घेतलेल्या अवस्थेत महेशचा मृतदेह आढळून आला.

पोलिसांनी दिली माहिती
अटकेची भीती, पश्चाताप किंवा भीतीतून त्याने हे टोकाचं पाऊल उचललं असावं, असा प्राथमिक अंदाज पोलिसांकडून व्यक्त केला जात आहे. जखमी तरुणीवर सध्या रुग्णालयात उपचार सुरू असून जुन्नर पोलिस या संपूर्ण प्रकरणाचा अधिक तपास करत आहेत.