म. टा. वृत्तसेवा, त्र्यंबकेश्वर : शहरात शिक्षणासाठी आलेल्या परप्रांतीय विद्यार्थ्याचा एका वाहनाने दिलेल्या धडकेत मृत्यू झाला. नाशिक-त्र्यंबक रस्त्यावरील संदीप फाउंडेशनसमोर हा अपघात झाला. वेलपुला पुरनावमशी वेलपुला आनंद (वय २२, रा. चिंतल, आंध्र पदेश) असे मृत विद्यार्थ्याचे नाव आहे.
पोलिस सुत्रांनी दिलेल्या माहितीनुसार, वेलपुला हा संदीप फाउंडेशन संकुलाच्या गेट नं. २ ने बाहेर पडून रस्त्याच्या पलीकडे काही वस्तू घेण्यासाठी गेला होता. परत येत असताना त्याला नाशिककडून त्र्यंबकेश्वरच्या दिशेने भरधाव जाणाऱ्या वाहनाची (क्र. एमएच १५ जीवाय ५३६२) जोरात धडक बसली. संदीप फाउंडेशन शिक्षण संकुलाच्या गेट नं. २ समोरच हा प्रकार घडला. अपघातानंतर संदीप फाउंडेशनची रुग्णवाहिका उपलब्ध न झाल्याने संतप्त विद्यार्थ्यांनी रास्ता रोको केला. रुग्णवाहिकेत ऑक्सिजनऐवजी तांदुळ भरलेले आढळून आले, जखमी विद्यार्थ्याला वेळीच मदत मिळाली नाही, असा आरोप विद्यार्थ्यांनी केला.
नाशिक शहरातील ‘ब्लॅक स्पॉट’ शोधून टवाळखोरांना ‘खाकी’चा दणका ! संशयितांवर प्रतिबंधात्मक कारवाईला सुरुवात
शुक्रवारी (दि. १५) रात्रीच्या सुमारास हा प्रकार घडला. घटनेची माहिती मिळताच त्र्यंबक पोलिस ठाण्याचे निरीक्षक बिपीन शेवाळे यांनी सहकाऱ्यांसह घटनास्थळी धाव घेत विद्यार्थ्यांची समजूत काढली. बहुतांश विद्यार्थी आंध्र प्रदेशातील असल्याने संवाद साधण्यास भाषेची अडचण निर्माण झाल्याने अधिकच गोंधळ वाढला. संदीप फाउंडेशनच्या व्यवस्थापनातील अधिकारीही घटनास्थळी वेळेत न पोहोचल्याने विद्यार्थी अधिकच संतप्त झाले. अखेर पोलिसांनी निवासी प्राध्यापकांशी संपर्क करून त्यांना घटनास्थळी बोलावल्यानंतर विद्यार्थ्यांनी आंदोलन मागे घेतले.
दरम्यान, शनिवारी (दि. १६) दुपारी मृताचा भाऊ वेलपुला मुरली (वय ३२) याने त्र्यंबकेश्वर पोलिस ठाण्यात येवून फिर्याद दाखल केली. त्यानुसार त्र्यंबक पोलिस ठाण्यात वाहनचालकाविरोधात सदोष मनुष्यवधाचा गुन्हा दाखल करण्यात आला आहे. हवालदार एस. एन. निंबेकर पुढील तपास करीत आहेत.