म. टा. विशेष प्रतिनिधी, नाशिक : केंद्रीय पर्यावरण, वने व हवामान बदल मंत्रालयातर्फे स्वच्छ हवा सर्वेक्षणाच्या पुरस्कारांची घोषणा करण्यात आली आहे. त्यात ‘स्वच्छ व सुंदर शहर’ अशी बिरुदावली मिळवणाऱ्या नाशिकने देशातील १३१ शहरांमध्ये २१ वा क्रमांक पटकावला. तर, राज्यात नाशिक चौथ्या स्थानावर आहे. या सर्वेक्षणात २०० गुणांपैकी नाशिकला १६०.०३ गुण मिळाले. राज्यात ठाणे पहिल्या, मुंबई दुसरे आणि नागपूर तिसऱ्या क्रमांकावर आहे. गतवेळेपेक्षा नाशिकची कामगिरी उंचावल्याचा दावा महापालिकेच्या पर्यावरण विभागाने केला आहे.
राज्यात चौथा क्रमांक
गेल्या वेळेस या सर्वेक्षणात नाशिकला १३८ गुण मिळाले होते. परंतु, क्रमवारी मिळाली नव्हती. यंदा स्वच्छ हवेची गुणवत्ता सुधारली असून, नाशिक देशात २१ व्या क्रमांकावर, तर राज्यात चौथ्या क्रमांकावर आल्याची माहिती पर्यावरण विभागाचे उपायुक्त विजयकुमार मुंडे यांनी दिली. राज्यात ठाणे शहराने पहिला, मुंबई शहराने दुसरा आणि नागपूरने तिसरा क्रमांक पटकावला.
इंदूर प्रथम, तर ठाणे तिसरे
स्वच्छ वायू सर्वेक्षणात १८७ गुण मिळवून इंदूर हे देशात पहिले, तर आग्रा हे १८६ गुण मिळवून दुसरे शहर ठरले. तिसऱ्या क्रमांकावर महाराष्ट्रातील ठाणे हे असून, या शहराला १८५ गुण मिळाले आहेत. नाशिक महापालिकेला १६० गुण मिळाले असून, गतसर्वेक्षणात १३८ गुण मिळाले होते.