मुंबई: ‘बिपरजॉय’ चक्रीवादळाचा गुजरातच्या दिशेने प्रवास सुरू झाल्याने मुंबईला काहीसा दिलासा मिळाला असला, तरी गेल्या दोन दिवसांपासून जोरदार वाऱ्यामुळे मुंबईत ५० ठिकाणी झाडे-फांद्या कोसळणे, घराचा भाग कोसळणे, शॉटसर्किटच्या घटना घडल्या आहेत. यामध्ये एकूण सहाजण जखमी झाले आहेत. जुहू येथील समुद्रात पोहण्यासाठी गेलेली पाच अल्पवयीन मुले सोमवारी सायंकाळी पाचच्या सुमारास बुडाल्याची घटना घडली.समुद्रात कमी दाबाचा पट्टा निर्माण झाल्यामुळे मुंबईसह कोकण किनारपट्टीला ‘बिपरजॉय’ वादळाचा फटका बसण्याचा अंदाज हवामान खात्याने वर्तवला होता. मात्र वादळाची दिशा बदलल्याने मुंबईत जोरदार वारे आणि काही ठिकाणी झालेला पाऊस वगळता मोठा फटका बसला नाही. मात्र चक्रीवादळाच्या स्थितीमुळे समुद्र खवळलेल्या स्थितीत होता. जोरदार वाऱ्यामुळे प्रचंड मोठ्या प्रमाणात धुळीचे लोट उठण्याचे प्रकार सुरू आहेत. ताशी ५० ते ६० किमी वेगाने वारे वाहत असून, आज, मंगळवारीदेखील अशीच स्थिती राहणार आहे. काही ठिकाणी पाऊस पडण्याची शक्यताही वर्तविण्यात आली आहे. चक्रीवादळाच्या पार्श्वभूमीवर पालिकेच्या आपत्कालीन विभागाने सज्जता ठेवली आहे.
जोरदार वाऱ्यामुळे मुंबई शहर विभागात १३, पूर्व उपनगरात ८ आणि पश्चिम उपनगरात २७ ठिकाणी झाडे-फांद्या कोसळण्याच्या घटना घडल्या. वर्सोवा अंधेरी येथे झाड अंगावर कोसळल्याने रोहन बार्ला (१७) हा तरुण जखमी झाला असून, त्याला उपचारासाठी कूपर रुग्णालयात दाखल करण्यात आहे. त्याची प्रकृती स्थिर आहे. दहिसर पूर्व येथे मुरबाळी तलाव येथे झाड अंगावर कोसळून निशा मिस्त्री (४४) ही महिला जखमी झाली. तिच्यावर मिरा रोड येथील भक्तीवेदांत रुग्णालयात उपचार सुरू असून, प्रकृती स्थिर आहे.
जोरदार वाऱ्यामुळे मुंबई शहर विभागात १३, पूर्व उपनगरात ८ आणि पश्चिम उपनगरात २७ ठिकाणी झाडे-फांद्या कोसळण्याच्या घटना घडल्या. वर्सोवा अंधेरी येथे झाड अंगावर कोसळल्याने रोहन बार्ला (१७) हा तरुण जखमी झाला असून, त्याला उपचारासाठी कूपर रुग्णालयात दाखल करण्यात आहे. त्याची प्रकृती स्थिर आहे. दहिसर पूर्व येथे मुरबाळी तलाव येथे झाड अंगावर कोसळून निशा मिस्त्री (४४) ही महिला जखमी झाली. तिच्यावर मिरा रोड येथील भक्तीवेदांत रुग्णालयात उपचार सुरू असून, प्रकृती स्थिर आहे.
दरम्यान, मुंबई शहर भागात व पश्चिम उपनगरात प्रत्येकी तीन ठिकाणी घराचा भाग कोसळल्याच्या घटना घडल्या. जुहू वर्सोवा लिंक रोड, कपासवाडी येथे बांधकाम सुरू असलेल्या घराची भिंत कोसळून दोन महिला जखमी झाल्या. तर वांद्रे पश्चिम येथील दया उमर्षी चाळ येथे घरावरील पत्रा पडून दोन जण जखमी झाल्याची घटना घडली. शहर आणि उपनगरात १५ ठिकाणी शॉर्ट सर्किट झाले. यात कुणी जखमी झाले नाही, अशी माहिती पालिकेच्या आपत्कालीन विभागाकडून देण्यात आली आहे.
जुहू समुद्रात पाच मुलं बुडाली
समुद्रकिनाऱ्यांवर लाटांचा मारा वाढलेला असतानाच, जुहू समुद्रात सुमारे अर्धा किमी अंतरावर १२ ते १५ वयोगटातील सहा मुले पोहण्यासाठी गेली होती. पाण्याचा अंदाज न आल्याने ती बुडू लागली. चौपाटीवर उपस्थित नागरिक व मच्छिमारांना त्यापैकी एकास वाचविण्यात यश आले. अग्निशमन दल, नौदल आणि तटरक्षक दलाने आपल्या जलतरणपटूंमार्फत शोधमोहीम सुरू केली. मात्र समुद्राला भरती असल्याने त्यात अडथळे येत होते. अखेर सुमारे एक ते दीड तासाच्या शोधानंतर सहा वाजता ही मोहीम थांबविण्यात आल्याची माहिती देण्यात आली. नौदलाकडून हेलिकॉप्टरने शोध घेतला जाणार असून, अतिरिक्त पाणबुड्यांचे पथकही सज्ज ठेवण्यात आले आहे, असे नौदलातर्फे सांगण्यात आले आहे.