या काळात अतिवृष्टीसदृश पावसाची शक्यता असल्याने सखल भागांत पाणी साचणे, नदी-नाल्यांना पूर येणे, काही प्रमाणात संरचनात्मक नुकसान होणे, तसेच काही ठिकाणी जनजीवन विस्कळीत होण्याची शक्यता नाकारता येत नाही. मध्य महाराष्ट्रातील घाट परिसरात काही ठिकाणी दरड कोसळण्याचीही शक्यता नाकारता येत नाही. सध्याच्या हवामान अंदाजानुसार, २९ जुलै रोजी कमी दाबाच्या पट्ट्याचा प्रभाव प्रामुख्याने विदर्भात, विशेषतः पूर्व विदर्भात जाणवण्याची शक्यता आहे. ३० जुलै रोजी त्याचा प्रभाव पश्चिम विदर्भ, खानदेश, उत्तर मराठवाडा, मध्य महाराष्ट्रातील घाट परिसर आणि कोकणात अधिक जाणवू शकतो.

Vidarbha Rain Update : विदर्भातील 3 जिल्ह्यांना पावसाचा रेड अलर्ट, नागपूरमध्ये शाळा-महाविद्यालयांना सुट्टी

मुंबईतही जोर वाढणार

मुंबई आणि मुंबई महानगर प्रदेशात ३० आणि ३१ जुलैदरम्यान पावसाचा जोर वाढण्याची शक्यता आहे. विशेषतः रायगड, ठाणे आणि पालघर जिल्ह्यांमध्ये ३० जुलै रोजी पावसाची तीव्रता अधिक राहण्याची शक्यता आहे.

नागपूरमध्ये मुसळधार

शहरात मंगळवारी दुपारी अवघ्या काही तासांत झालेल्या मुसळधार पावसाने नागरिकांची दाणादाण उडाली. ठिकठिकाणी कमरेपर्यंत पाणी साचल्याने अनेक नागरिक अडकले, तर दुचाकी आणि चारचाकी वाहने पाण्यात बुडाली. काही शाळांमध्ये पाणी शिरल्याने विद्यार्थ्यांना दोरखंडांच्या साहाय्याने सुरक्षित बाहेर काढावे लागले. स्वावलंबीनगर भागात तर अडकलेल्या नागरिकांना बाहेर काढण्यासाठी बोटीचा वापर केला.

शहरात सुरू असलेल्या विविध विकासकामांचा फटका पुन्हा एकदा नागरिकांना बसला. खोदकामे, अपूर्ण रस्ते आणि तुंबलेल्या नाल्यांमुळे अनेक वस्त्यांमध्ये पाणी शिरले. त्यामुळे नागरिकांनी प्रशासनाविरोधात तीव्र संताप व्यक्त केला.

जुलैतील पाऊस मोडणार विक्रम?

जुलैमध्ये पहिल्या दहा दिवसांतच महिनाभराची सरासरी ओलांडणाऱ्या पावसाने मंगळवारी पाचशे मिलिमीटरचा टप्पा ओलांडला. शहरात १ जुलै ते २८ जुलै, मंगळवारी रात्रीपर्यंत साडेआठपर्यंत ५०८.१ मिलिमीटर पावसाची नोंद झाली आहे. यंदाच्या जुलै महिन्याची नोंद ही गेल्या काही वर्षांतील सर्वाधिक पावसाची म्हणून होणार आहे. याशिवाय, १९०७ मध्ये जुलैत झालेल्या ५०८.५ मिमी पावसाचा विक्रम मोडल्याचीही नोंद होण्याची चिन्हे आहेत.
पावसाने पुण्यात यंदा जूनमध्ये ओढ दिल्याने महिन्याची सरासरी देखील गाठता आली नव्हती; पण जुलै महिन्याच्या पहिल्या दिवसापासूनच संततधार पावसाला सुरुवात झाली आणि दहा दिवसांतच महिनाभराची सरासरी ओलांडली. त्यानंतर पावसाने काही दिवस विश्रांती घेतली होती; पण गेल्या आठवड्यापासून पुन्हा पाऊस सक्रिय झाला आहे. पुणे शहरात एक जून ते २८ जुलै या कालावधीत ५७२ मिमी पावसाची नोंद झाली आहे. शहराबरोबरच जिल्हा आणि घाटमाथ्यावरही पावसाने जोरदार हजेरी लावली आहे.

दरम्यान, शहरात मंगळवारीदेखील आकाश दिवसभर ढगाळ होते आणि दुपारी बाराच्या दरम्यान पावसाच्या जोरदार सरी बरसल्या. उपनगर आणि धरणक्षेत्रात मध्यम पाऊस पडला. पुढील दोन दिवस शहरात आकाश मुख्यतः ढगाळ राहणार असून, हलक्या ते मध्यम स्वरूपाच्या सरींची शक्यता आहे. घाटमाथ्यावर जोरदार; तर काही ठिकाणी अतिजोरदार पाऊस पडणार असल्याचा अंदाज भारतीय हवामानशास्त्र विभागाने व्यक्त केला आहे.