अधिकृत घोषणा

माळेगाव कारखान्याच्या अध्यक्षपदासाठी आज, १२ मार्च रोजी विशेष निवडणूक प्रक्रिया पार पडली. बारामतीचे प्रांताधिकारी तथा निवडणूक निर्णय अधिकारी वैभव नावडकर यांनी या निवडीची अधिकृत घोषणा केली. दुपारी कारखान्याच्या मुख्य कार्यालयात संचालक मंडळाची महत्त्वाची बैठक पार पडली. या बैठकीत अध्यक्षपदासाठी सुनेत्रा पवार यांचा एकमेव अर्ज दाखल झाला. इतर कोणताही उमेदवारी अर्ज न आल्याने ही निवड बिनविरोध झाल्याचे निवडणूक निर्णय अधिकाऱ्यांनी जाहीर केले.

निवडणुकीला मिळालेली स्थगिती

वास्तविक, या कारखान्याच्या अध्यक्षपदाची निवडणूक यापूर्वी १ मार्च रोजी होणार होती. मात्र, तत्कालीन तांत्रिक कारणांमुळे आणि निवडणूक निर्णय अधिकारी वैभव नावडकर यांच्या अनुपस्थितीमुळे ही प्रक्रिया अनपेक्षितपणे पुढे ढकलण्यात आली होती. या स्थगितीमुळे तालुक्यात विविध चर्चांना उधाण आले होते. त्यानंतर प्रशासनाने तातडीने हालचाली करत १२ मार्च ही नवीन तारीख निश्चित केली होती. आज शांततेत ही प्रक्रिया पार पडल्याने सर्व चर्चांना पूर्णविराम मिळाला आहे.

Jalgaon Crime : दोन नंबर प्लेटची कार, अपघातानंतर चालक फरार; गाडीत सापडल्या पोलिसांच्या काठ्या, मुक्ताईनगरमध्ये खळबळ

विकासकामांचे उद्दिष्ट

माळेगाव कारखान्याच्या कारभारात सातत्य राहावे आणि आधुनिकीकरणाच्या प्रकल्पांना वेग मिळावा, यासाठी सुनेत्रा पवार यांनीच धुरा सांभाळावी, असा आग्रह संचालक मंडळातील सदस्यांनी धरला होता. संचालकांच्या या विनंतीला मान देऊन त्यांनी ही जबाबदारी स्वीकारण्यास संमती दर्शवली. आगामी काळात शेतकऱ्यांच्या हिताचे निर्णय आणि कारखान्याची आर्थिक घडी अधिक मजबूत करणे, हेच आपले मुख्य उद्दिष्ट असल्याचे नूतन अध्यक्षांच्या निकटवर्तीयांकडून सांगण्यात आले.

Raju Shetti : आंबा-काजू बागायतदार आक्रमक, राजू शेट्टींचा सरकारला इशारा; मागण्यांवर निर्णय न झाल्यास मुंबई-गोवा महामार्ग रोखणार
या निवडीनंतर कारखाना कार्यक्षेत्रातील सभासद आणि कार्यकर्त्यांनी मोठा जल्लोष केला. सुनेत्रा पवार यांच्या निवडीमुळे माळेगाव कारखान्याला नवा आयाम मिळेल, अशी भावना शेतकरी वर्गातून व्यक्त होत आहे.