रायगड-प्रतिनिधी
कर्जत तालुक्यातील पोसरी गावाजवळ उल्हास नदीच्या किनारी असलेल्या ओढ्यात एका तरुणाचा मृतदेह आढळून आल्याने परिसरात मोठी खळबळ माजली आहे. शनिवारी (25 ऑक्टोबर) स्थानिक नागरिक या मार्गाने जात असताना त्यांना पाण्यात तरंगणारा मृतदेह दिसून आला आणि त्यांनी तात्काळ पोलिसांना या घटनेची माहिती दिली.
मृतदेहावर कुठली जखम नाही, पायात चप्पलही तशीच
कर्जत पोलिसांनी घटनास्थळी धाव घेतली असता, ओढ्यात साचलेल्या पाण्यात सुमारे 25 ते 30 वयोगटातील तरुणाचा मृतदेह तरंगताना दिसून आला. मृतदेहाच्या अंगावर कोणतीही बाह्य जखम दिसली नाही, तर त्याच्या पायात चप्पलदेखील तशीच होती. त्यामुळे प्राथमिकदृष्ट्या मारहाणीचा किंवा हिंसाचाराचा संशय कमी मानला जात आहे.
दरम्यान, पाण्यात बुडाल्यामुळे मृतदेहाच्या चेहऱ्यावर आणि कानाच्या भागावर मासे आणि कीटकांनी चावे घेतल्याचे पोलिसांनी सांगितले. त्यामुळे मृत्यू काही तासांपूर्वी किंवा एक दिवस आधी झाला असावा, असा अंदाज व्यक्त केला जात आहे. प्राथमिक तपासानुसार, सदर तरुणाने दारूचे सेवन करून अपघाताने पाण्यात पडल्याची शक्यता नाकारली जात नाही.मात्र, हा तरुण स्वतःहून त्या ठिकाणी गेला होता की कोणीतरी त्याला तेथे आणले, याबाबत पोलिस तपास करत आहेत. या परिसरात वाहतं पाणी नसल्यामुळे मृत्यू नैसर्गिक की घातपातजन्य, याचे गूढ अद्याप कायम आहे.
सध्या मृत व्यक्तीची ओळख पटलेली नसून तो परप्रांतीय असण्याची शक्यता व्यक्त करण्यात आली आहे. मृतदेह ताब्यात घेऊन कर्जत उपजिल्हा रुग्णालयात शवविच्छेदनासाठी पाठविण्यात आला असून, पोस्टमार्टम अहवालानंतर मृत्यूचे नेमके कारण स्पष्ट होणार आहे.
या घटनेमुळे पोसरी गाव आणि परिसरात भीतीचे व वातावरण निर्माण झाले आहे. कर्जत पोलिस ठाण्याचे अधिकारी या घटनेचा सखोल तपास करत असून, घटनास्थळाचा पंचनामा आणि मृत व्यक्तीच्या ओळखीचा शोध सुरू आहे.
पोलिसांकडून नागरिकांना आवाहन करण्यात आले आहे की, अशा संशयास्पद प्रकरणांबाबत कोणतीही माहिती असल्यास ती तात्काळ पोलीस ठाण्यात कळवावी.