नासिक

महिलांच्या लैंगिक शोषणाचे गंभीर आरोप असलेला स्वयंघोषित भोंदू बाबा अशोक खरात याचे काळे कारनामे एकामागून एक बाहेर पडताना दिसत आहेत. आता भोंदू बाबा अशोक खरातच्या भोवती पोलिसांनी फास आवळण्यास सुरुवात केली आहे. आता विशेष तपास पथकाने (SIT) खरातच्या ओकस प्रॉपर्टी या कार्यालयावर छापेमारी केली आहे. या छापेमारीत केवळ प्रॉपर्टीचे व्यवहारच नाही तर अघोरी विद्येचा वापर होत असल्याचे पुरावे समोर आले आहेत. या कारवाईमुळे नाशिक जिल्ह्यात मोठी खळबळ उडाली आहे. आज त्याला पुन्हा न्यायालयात हजर केले जाणार आहे.

कार्यालयातील त्या डब्यात काय आढळले?

यावेळी तपासादरम्यान पोलिसांना खरातच्या कार्यालयातून अत्यंत संशयास्पद वस्तू मिळाल्या आहेत. ज्याचा वापर जादूटोण्यासारख्या कृत्यांसाठी केला जाण्याची शक्यता वर्तवण्यात येत आहे. या जप्त साहित्यामध्ये विविध गोष्टींचा समावेश आहे. पोलिसांना त्याच्या ऑफिसमध्ये इंग्रजीतील A ते Z अक्षरे आणि १ ते २६ अंक लिहिलेली एक विशेष पट्टी सापडली आहे. याचा वापर सहसा मृतात्म्यांशी संवाद साधण्यासाठी किंवा ‘प्लॅन्चेट’ सारख्या अघोरी प्रकारांसाठी केला जातो.

त्यासोबतच एका डब्यातून २२ रुद्राक्ष आणि भिंगाची काच जप्त करण्यात आली आहे. तसेच एका बाटलीत हिरव्या मळकट रंगाचे संशयास्पद पातळ द्रव्य सापडले आहे. हे सध्या रासायनिक विश्लेषणासाठी पाठवले जाण्याची शक्यता आहे. त्यासोबतच शिवनिका संस्थान या नावाचे कोरे पावती पुस्तकही पोलिसांच्या हाती लागले आहे, ज्यातून आर्थिक फसवणुकीचा धागा समोर येण्याची शक्यता वर्तवली जात आहे.

तिसऱ्या गुन्ह्यात आज कोर्टात हजेरी

अशोक खरातवर आतापर्यंत पुणे, नाशिकसह अनेक महिलांनी लैंगिक शोषणाचे गुन्हे दाखल केले आहेत. यातील दोन गुन्ह्यांत तो आधीच अटकेत आहे. आता तिसऱ्या गुन्ह्याच्या तपासासाठी SIT त्याला आज पुन्हा न्यायालयात हजर करणार आहे. जप्त करण्यात आलेल्या या नवीन पुराव्यांच्या आधारे पोलीस पुन्हा पोलीस कोठडीची मागणी करण्याची दाट शक्यता आहे.

अशोक खरात हा ओकस प्रॉपर्टीच्या नावाखाली आपले कार्यालय चालवत होता. मात्र, प्रत्यक्षात तिथे धर्माचा आधार घेऊन महिलांना वश करणे आणि त्यांचे शारीरिक व आर्थिक शोषण करणे, असे गंभीर प्रकार सुरू असल्याचे तपासात स्पष्ट झाले आहे. अशोक खरातने शिवनिका संस्थानच्या नावाने किती लोकांची फसवणूक केली आणि गोळा केलेल्या पैशांचा कुठे कुठे वापर केला, याचा तपास आता वेगाने सुरू आहे.