प्रशांत बनकरचं कुटुंब काय म्हणालं?
प्रशांत बनकर याचा भाऊ टीव्ही९ मराठी वृत्तवाहिनीशी बोलताना म्हणाला की “माझा भाऊ फलटणमधील घरात पोलिसांना सरेंडर झाला. काल सकाळपासूनच आमच्या वडिलांना पोलीस स्टेशनमध्ये थांबवून ठेवलं होतं, कारण माझा भाऊ येत नव्हता. आम्ही त्याला सांगितलं की तू फोन उचलेनास, नंतर फोन स्विच ऑफ केला, तो पळतोय, घाबरलाय असं वाटत होतं.” असं आरोपी प्रशांत बनकर याच्या भावाने सांगितलं.
‘नेहमी तणावात दिसायच्या’
दरम्यान, प्रशांत बनकर याची बहीण टीव्ही९ मराठी वृत्तवाहिनीशी बोलताना म्हणाल्या की, “त्या (मयत डॉक्टर तरुणी) इथे राहायला येऊन वर्ष होत आलं. त्यावेळेसच मी एक-दोन महिने इथे राहायला होते. आमचं नातं इतकं घट्ट झालं होतं, की त्या प्रत्येक गोष्ट माझ्याशी शेअर करायच्या, मी जॉब करायचे, त्यामुळे त्यांना म्हणायचे की तुमचा सरकारी जॉब आहे तर चांगलं आहे, मग त्या सांगायच्या, की असं काही नाही, मला खूप स्ट्रेस आहे, त्या नेहमी तणावात दिसायच्या.” असं प्रशांतच्या बहिणीने सांगितलं.
‘डॉक्टरने मेसेजवर प्रपोज केलं होतं’
प्रशांतची बहीण पुढे म्हणाली, की “सहा महिन्यांपूर्वी आठ दिवसांसाठी माझा भाऊ इथे राहायला आला होता. त्या माझ्या भावाला दादा म्हणायच्या, आमच्यासारखंच त्या दोघांचंही चांगलं बोलणं व्हायचं, तो इथून पुण्याला गेल्यावर डॉक्टरने त्याला मेसेजवर प्रपोज केलं होतं, माझा भाऊ म्हणाला, की ‘नाही मॅडम, मी तुम्हाला घरातल्यासारखं मानतो, तुम्ही मला दादा म्हणता’ त्याने स्वतःच्या बाजूने काही नाही हे क्लिअर केलं होतं. ” असा दावाही प्रशांतच्या बहिणीने केला.
‘नकार दिल्याचा राग आला असावा’
“माझा भाऊ जर त्यांचा मानसिक छळ करत होता, तर लक्ष्मीपूजनाला असेल, किंवा आमच्या घरात त्या नेहमी असायच्या.. एवढं चांगलं रिलेशन होतं, त्यांचे आई वडील राहायला आले होते. मग त्यावेळी त्या किंवा त्यांचे आई वडीलकाहीच कसं बोलले नाहीत? फक्त प्रशांतने नकार दिला, म्हणून राग आला का माहिती नाही, तळहातावर त्याचं नाव का लिहिलं हे नेमकं माहिती नाही, पण त्यांचा संपर्क नव्हता.” असा दावाही प्रशांत बनकरच्या बहिणीने बोलताना केला.