मुंबईत आज मध्यरात्रीपासूनच मुसळधार पाऊस (Mumbai Rain Update) कोसळत असल्याने शहरातील सखल भागांत पाणी साचलं असून नागरिकांची दैना उडाली आहे. या पावसामुळे मुंबईसह उपनगरांतील जनजीवन विस्कळीत झालं असून आवश्यक असेल तरच घराबाहेर पडण्याचं आवाहन प्रशासनाकडून करण्यात आलं आहे. तसंच आपत्कालीन परिस्थितीत मदतीसाठी किंवा अधिकृत माहितीसाठी बृहन्मुंबई महानगरपालिकेच्या मुख्य नियंत्रण कक्षाच्या 1916 या संपर्क क्रमांकावर संपर्क साधावा, असं आवाहन बीएमसीने केलं आहे.

दरम्यान, रेल्वे ट्रॅकवर पावसाचे पाणी साचल्याने लोकल गाड्यांवर परिणाम झाला असून अनेक गाड्या उशिराने धावत आहेत. त्यामुळे कामावर निघाल्या नोकरदारांना मनस्ताप सहन करावा लागत आहे.

पुण्यातही मुसळधार पावसाचा अंदाज (Pune Rain Update)

पुणे शहरात मध्यवर्ती भागासह उपनगरांत काही ठिकाणी पावसाचा शिडकावा झाला, तर काही ठिकाणी सरीही हजेरी लावत होत्या. सलग तिसऱ्या दिवशी पुण्यासह चिंचवडमध्येही दिवसभर दमदार पाऊस झाला. आज, सोमवारीही (15 सप्टेंबर) मेघगर्जना आणि विजांच्या कडकडाटासह मध्यम स्वरूपाचा पाऊस होणार आहे, असा अंदाज भारतीय हवामानशास्त्र विभागाने व्यक्त केला आहे. त्यानंतर आठवडाभरात पावसाचा जोर कमी होण्याची शक्यता आहे.

विदर्भालाही पावसाचा इशारा (Vidharbh Rain Update)

गेल्या आठवड्याच्या उत्तरार्धात चांगल्या पावसाचा अंदाज प्रादेशिक हवामान खात्याने वर्तविला होता. त्यानुसार पाऊस झालाही. आताही पुढील दोन दिवस शहरासह संपू्र्ण विदर्भाला येलो अलर्ट देण्यात आला आहे. इतकेच नाही तर पुढे 25 सप्टेंबर, अर्थात महिनाअखेरपर्यंत विदर्भात चांगल्या पावसाचा अंदाज आहे. गेल्या आठवड्यात 13 सप्टेंबरपासून पावसाला सुरुवात झाली. शनिवारी संध्याकाळी व मध्यरात्रीसुद्धा विदर्भात काही ठिकाणी पावसाची नोंद करण्यात आली. आता पुढील दोन दिवस संपूर्ण विदर्भात चांगल्या पावसाची शक्यता आहे. सोमवार व मंगळवारी सर्वच जिल्ह्यांना यलो अलर्ट देण्यात आला आहे. त्यामुळे सर्वच जिल्ह्यांमध्ये विजांच्या गडगडाटासह वादळी पावसाची शक्यता आहे.