जळगावच्या पारोळा येथील राष्ट्रवादी काँग्रेस शरदचंद्र पवार पक्षाचे माजी मंत्री डॉ. सतीश पाटील यांचा उपमुख्यमंत्री अजित पवार यांच्या नेतृत्वातील राष्ट्रवादी काँग्रेस पक्षात प्रवेश निश्चित झाला आहे. डॉ. सतीश पाटील यांनीच या प्रवेशाबाबतची माहिती दिली आहे. सतीश पाटील येत्या 3 मे रोजी मुंबईत अजित पवार यांच्या उपस्थितीत हजारो कार्यकर्त्यांसह राष्ट्रवादी काँग्रेस पक्षात प्रवेश करणार आहेत. अजित पवार यांच्याशी फोनवरून बातचित झाली असून त्यांनी प्रवेशाची तारीख निश्चित केली असल्याचे सतीश पाटील यांनी सांगितलं आहे.

सतीश पाटील यांनी आज त्यांच्या मतदारसंघातील कार्यकर्त्यांसोबत बैठक घेतली. यावेळी त्यांनी राष्ट्रवादी काँग्रेस पक्षात प्रवेश करण्याबाबत कार्यकर्त्यांची भूमिका जाणून घेतली. विरोधात असल्यामुळे कामे होत नाहीत. त्यामुळे आपण सत्तेत असलो पाहिजे, असा कार्यकर्त्यांचा आग्रह आहे. त्यानुसार अजित पवार यांच्या नेतृत्वातील राष्ट्रवादी काँग्रेस पक्षात जाण्याचा निर्णय घेतला, असं सतीश पाटील म्हणाले.

सतीश पाटील यांची भावनिक गुंतागुंत

“शरद पवार साहेबांशी बोलण्याची हिंमत नाही. मात्र प्रदेशाध्यक्ष जयंत पाटील यांना कल्पना दिली होती. तसेच आज खासदार सुप्रिया सुळे यांच्याशी सुद्धा याबाबत बोलणं झालं”, असं सतीश पाटील म्हणाले. “शरद पवार साहेबांनी मला खूप दिलं. त्यांच्या विरोधात किंवा इतर लोकांच्या विरोधात माझी कुठलीही नाराजी नाही”, असेही सतीश पाटील यांनी स्पष्ट केलं आहे. “अजित पवार यांच्याकडे गेलो तरी माझं दैवत हे शरद पवार हेच असतील”, अशी सुद्धा भूमिका सतीश पाटील यांनी स्पष्ट केली आहे

सत्ताधाऱ्यांच्या त्रासाला कंटाळून सत्तेत जाण्याचा निर्णय?

“सत्ताधारी आमच्या कार्यकर्त्यांना त्रास देत देतात, कुठलीही कामे होत नाहीत. त्यामुळे सत्तेत जाण्याचा आग्रह कार्यकर्त्यांनी धरला, आणि त्या सर्वांशी चर्चेनंतर अजित पवार यांच्यासोबत जाण्याचा निर्णय घेतला”, असं सतीश पाटील यांनी सांगितलं. “भविष्यात शरद पवार आणि अजित पवार हे एकत्र येतील”, असा विश्वास सुद्धा सतीश पाटील यांनी व्यक्त केला आहे.