या प्रकरणी लीना जगदीश नांदापूरकर (वय ५५, रा. कासलीवाल विश्व, पार्वतीनगर) यांनी दिलेल्या तक्रारीनुसार, त्यांना चार मार्च रोजी दुपारी साडेतीनच्या दरम्यान ७८००३१०८९९७ वरून व्हॉटसअॅप कॉल आला. या कॉलवर ‘मी कुलाबा पोलिस ठाण्यातून बोलत आहे. तुमचे आधार कार्ड, पॅन कार्डवरून कनडा बँक, कुलाबा मुंबईत बँक खाते उघडण्यात आलेले आहे. हे खाते मनी लाँड्रिंग, ड्रग्ज ट्रॅफिकिंग आणि आयडेंटीटी थेफ्ट यासारख्या गुन्ह्यांसाठी वापरण्यात आलेले आहे.
पहलगाम हल्ल्यात 3 पाकिस्तानी दहशतवादी, तपासात हैराण करणारी माहिती उघड, सुरक्षा दलांनी अनेकांना घेतले ताब्यातया प्रकरणात गुन्हे दाखल आहेत. सदर खाते हे नरेश गोयल नावाच्या व्यक्तीने उघडले आहे. तो फरारी आहे. नरेश गोयल हा कॅनडा बँकेचा मॅनेजर आहे,’ असे सांगण्यात आले. या लोकांनी तीन ते चार तास लीना नांदापूरकर यांची चौकशी केली. यानंतर अटकेची भीती दाखवून तुमच्याजवळील पैसे माझ्या अकाउंटवर टाका असा संदेश देण्यात आला. लीना नांदापूरकर यांनी अटकेच्या भीतीने चार मार्च ते २१ मार्च दरम्यान आरटीजीएस; तसेच गुगल पेच्या माध्यमातून ६१ लाख ७४ हजार रुपये सायबर चोरांच्या खात्यावर जमा केले.

या प्रकरणात फसवणूक होत असल्याचे लक्षात येताच लीना नांदापूरकर यांनी सायबर पोलिसांकडे धाव घेतली. या प्रकरणात जवाहरनगर पोलिस ठाण्यात दोन अज्ञातांच्या विरोधात गुन्हा दाखल करण्यात आला आहे. लीना नांदापूरकर यांचे पती हे एका खासगी कंपनीत व्यवस्थापक पदावर कार्यरत होते.

करोना काळात त्यांचा मृत्यू झाला होता. कंपनीकडून मिळालेले पैसे त्यांनी गुंतवले होते. त्यांच्याकडे बचतीचे पैसेही होते. सायबर चोरांनी त्यांना अटकेची भीती दाखवून ६० लाख रुपयांपर्यंत पैसे घेतले. सायबर चोरांनी २० लाखांची पुन्हा मागणी केली. यावर लीना नांदापूरकर यांनी माझ्याकडील सर्व पैसे संपल्याची कळकळीची विनंती सायबर चोरांना केली. या विनंतीनंतरही सायबर चोरांनी एक लाख रुपये टाकण्याचा आग्रह धरला. शेवटी बचत गट; तसेच नातेवाइकांकडून घेतलेले ९९ हजार गुगल पेवरून पाठविले. त्याच दिवशी सायबर चोरांचाही व्हॉटसअॅप कॉल बंद झाला.