वृत्तानुसार, पीडित मुलगी ही तामसा पोलीस ठाण्याच्या हद्दीतील रहिवासी आहे. याच गावातील उपसरपंच बाबुराव तुपेकर हा नराधम मुलीवर आत्याचार करायचा. विरोध केल्यानंतर तो पाण्यात गुंगीचे औषध टाकून अत्याचार करत होता. मागील जून महिन्या पासून तिच्यावर तो अत्याचार करत होता. पीडित मुलीला वडील आणि भाऊ आहेत. ते नेहमी कामा निमित्त बाहेरगावी जात असल्याने पीडित मुलगी घरी एकटी राहायची. याचा फायदा नराधमाने घेतला. याच दरम्यान ती गर्भवती राहिली. पीडित मुलीने आपल्या कुटुंबियांना घडलेली घटना सांगितली. बदनामीच्या भीतीपोटी कुटुंबियांनी वाच्यता केली नाही.

दुसरीकडे कुटुंबियांनी पीडित मुलीला प्रसुतीसाठी नांदेडच्या शासकीय रुग्णालयात दाखल करण्यात आले. यावेळी तिने एका मुलीला जन्म देखील दिला. त्यानंतर हे प्रकरण उघडकीस आले. याप्रकरणी आरोपी बाबुराव तुपेकर विरोधात पोक्सोचा गुन्हा दाखल करण्यात आला आहे. या घटनेने जिल्ह्यात एकच खळबळ उडाली आहे. नराधम आरोपीला पोलिसांनी अटक केल्याची माहिती पोलीस अधीक्षक अविनाश कुमार यांनी दिली.

जन्मलेल्या मुलीला विक्री केल्याची तक्रार

दरम्यान, घटना उघडकीस आल्यानंतर आरोपीने कुटुंबीयांवर दबाव टाकण्यास सुरुवात केली. काही राजकीय मंडळीना हाताशी धरून प्रकरण मिटवणाचा प्रयत्न करत होता. याचदरम्यान पीडितेने मुलीला जन्म दिला. आपली बदनामी होईल आणि प्रकरण अंगलट येईल, या भीतीने आरोपीने जन्मलेल्या मुलीची एक लाख रुपयात विक्री केल्याची तक्रार पीडित मुलीने पोलीस ठाण्यात केली केल्याची माहिती आहे. दरम्यान जन्मलेल्या मुलीची विक्री झाली का नाही? याबाबत तपास सुरु असून चौकशीत काय तथ्य आहे हे समोर येणार असल्याचे पोलीस अधीक्षक अविनाश कुमार यांनी दिली.