काँग्रेसचे माजी आमदार रवींद्र धंगेकर यांनी काही दिवसांपूर्वी शिंदे यांच्या शिवसेनेत प्रवेश केला होता. काँग्रेसकडून(Congress) दोन विधानसभा आणि एक लोकसभा निवडणूक लढवल्यानंतर रवींद्र धंगेकर(Ravindra Dhangekar) यांनी काँग्रेसला सोडचिठ्ठी देत शिवसेनेत प्रवेश केला होता. मात्र रवींद्र धंगेकर यांच्या सोशल मीडिया पोस्टवर आज अचानकपणे काँग्रेसचा पंजा दिसला. त्यामुळे शहरात एकच खळबळ उडाली. आज(२७ मार्च) जागतिक रंगभूमी दिन आहे. त्या रंगभूमी दिनाच्या शुभेच्छा देताना रवींद्र धंगेकर यांनी एक फेसबुक(Facebook) पोस्ट शेअर केली. या फेसबुक पोस्टमध्ये असणाऱ्या पोस्टर मध्ये रवींद्र धंगेकर यांच्या नावाच्या आधी काँग्रेसचा पंजा आणि खाली माजी आमदार रवींद्र हेमराज धंगेकर असं लिहिलेलं होतं.

हे पोस्टर समाज माध्यमांवर व्हायरल झाल्यानंतर रवींद्र धंगेकर यांच्या आपली चूक लक्षात आली. चूक लक्षात येताच रवींद्र धंगेकर यांनी आपली चूक सुधारून त्वरित पंजाच्या जागी धनुष्यबाण पोस्ट केला. त्यामुळे आता शहरात ‘रवींद्र धंगेकरांचे मन शिवसेनेत(Shivsena) रमेना आणि मनातून काही केल्या काँग्रेस जाईना’ अशी परिस्थिती झाली आहे का याची चर्चा सुरू झाली आहे.

“काँग्रेस पक्ष सोडणे माझ्यासाठी सोपे नाही. पण माझ्या मतदारसंघातील लोकांशी चर्चा घेऊनच हा कठीण निर्णय घेण्याची वेळ आली. शिंदे साहेब(Eknath Shinde) आणि उदय सामंत(Uday Samant) यांनी मला अनेकदा फोन केले. धंगेकर आमच्याकडे या, अशी ऑफर दिली. आमच्यात मित्रत्त्वाचं नातं आहे. त्यामुळे एकत्र काम करण्याचे मी ठरवले” असे रवींद्र धंगेकर यांनी शिंदेसेनेत प्रवेश करायच्या आधी म्हटले होते.