मुख्यमंत्री देवेंद्र फडणवीस यांनी प्रशांत कोरटकर याच्यावर केलेल्या कारवाईवर प्रतिक्रिया दिली आहे. कोरटकरचं मोबाईल लोकेशन ट्रॅक करुन अटक केल्याचं देवेंद्र फडणवीस यांनी सांगितलं आहे. शिवरायांचा अवमान खपवून घेतला जाणार नाही, असंही देवेंद्र फडणवीस म्हणाले आहेत. “कोल्हापूर पोलिसांनी अतिशय चांगल्या पद्धतीने टेक्निकल पुरावे जमा करुन त्यातून मुव्हमेंटचं ट्रॅकिंग करुन प्रशांत कोरटकरला अटक केली आहे. आता पुढची जी कायदेशीर कारवाई आहे, ती पोलीस करतील. या महाराष्ट्रात कुठल्याही परिस्थित आमचे आराध्य दैवत छत्रपती शिवाजी महाराज यांचा अपमान हा खपवून घेतला जाणार नाही. हेच या ठिकाणी पोलिसांनी दाखवून दिलं आहे”, अशी प्रतिक्रिया देवेंद्र फडणवीस यांनी दिली.

कोल्हापूर पोलीस काय म्हणाले?

“प्रशांत कोरटकरचा शोध घेण्यासाठी नागपूर, इंदौर, मुंबई, चंद्रपूर येथे जावून तपास करणारी विविध पथकं गठीत केली होती. कोल्हापूर न्यायालयाने देखील त्याचा अटकपूर्व जामीन अर्ज फेटाळला होता. आरोपीने मुंबई उच्च न्यायालयात धाव घेतली होती. त्याच्या अटकपूर्व जामीन अर्जावर आज मुंबई उच्च न्यायालयात सुनावणी होती. त्यापूर्वीच कोल्हापूर पोलिसांनी त्याला तेलंगणात अटक केली. कोल्हापूर पोलिसांनी दुपारी 2.45 वाजता तिथल्या स्थानिक पोलीस ठाण्यात कोरटकरला नेत अटकेबाबत माहिती दिली. यानंतर कोल्हापूर पोलीस कोरटकरला घेऊन कोल्हापूरच्या दिशेला रवाना झाली आहेत. रात्री उशिरा आरोपीला कोल्हापुरात आणल्यानंतर पुढील कायदेशीर प्रक्रिया पूर्ण केली जाईल. आरोपीला उद्या कोर्टात हजर केलं जाईल”, अशी माहिती पोलिसांनी दिली.

“कोल्हापूर पोलीस बऱ्याच अँगलने तपास करत होते. या दरम्यान राजवाडा पोलीस ठाण्यात दोन पथकं होती, स्थानिक गुन्हे शाखेचेदेखील पथकं गठीत केली होती. प्रसारमाध्यमांवरुनही आम्हाला माहिती मिळत होती. मध्ये काही दिवसांपूर्वी बातमी आली होती की, तो चंद्रपूर येथे वास्तव्यास आहे. त्यामुळे एक पथक चंद्रपूर येथे गेलं होतं. काही ठिकाणी टोलनाक्याचे फुटेज चेक केले होते. काही वाहनं होती, एका सीसीटीव्ही फुटेजमध्ये तो एका वाहनातून जाताना दिसला. त्यानंतर पोलीस पथकं हे तेलंगणाच्या दिशेला रवाना झाली”, अशी प्रतिक्रिया कोल्हापूर पोलिसांनी पत्रकार परिषदेत दिली.