काय घडले नेमके?

मंगळवारी (११ फेब्रुवारी) रात्री यादव कुटुंबात मोठा भाऊ राजू आणि आईने एकत्र जेवण केले. त्यानंतर आई घराबाहेर गप्पा मारत बसली होती. त्याच दरम्यान, लहान भाऊ विजय घरी परतला. मोठ्या भावाने त्याला उशिरा येण्याचे कारण विचारलं. विजयने स्पष्ट उत्तर न देता टाळाटाळ केली. यावर मोठ्या भावाने त्याला रागावले आणि पटकन जेवण करून झोपण्यास सांगितलं.

मात्र, मोठ्या भावाने ओरडल्याने लहान भाऊ विजय चिडला. दोघांमध्ये जोरदार वाद झाला. याच रागाच्या भरात विजय घरातून धावत गेला आणि काही वेळातच हातात धारदार विळा घेऊन परतला. आईच्या डोळ्यांसमोरच त्याने मोठ्या भावाच्या गळ्यावर सपासप वार केले. यात राजू रक्ताच्या थारोळ्यात खाली जमिनीवर कोसळला. हे पाहताच आईने हंबरडा फोडला. तिच्या आक्रोशाने शेजारी काय झालं हे पाहायला धावत आले, समोरील दृश्य पाहून सारेच हादरले. गंभीर जखमी राजूला वाचवण्यासाठी शेजाऱ्यांनी खूप प्रयत्न केला. मात्र, प्रचंड रक्तस्राव झाल्याने त्याचा जागीच मृत्यू झाला होता.

या घटनेची माहिती मिळताच कळमना पोलीस घटनास्थळी दाखल झाले. आईच्या तक्रारीवरून पोलिसांनी विजय यादव वर हत्येचा गुन्हा दाखल केला आहे. पोलिसांनी त्याला ताब्यात घेतले असून अधिक तपास सुरू आहे. या घटनेमुळे संपूर्ण कुटुंब हादरले आहे. केवळ किरकोळ वादातून एका भावाने दुसऱ्याचा जीव घेतल्याने परिसरात हळहळ व्यक्त केली जात आहे. आईसमोरच पोटच्या पोराचा दुसऱ्या पोराने जीव घेतल्याने तिने एकच हंबरडा फोडला, तिच्या वेदना पाहून साऱ्यांचे डोळे डबडबले.