सतीश उर्फ खोक्या भोसलेचे पाय आणखी खोलात जाण्याची शक्यता आहे. सतीश भोसलेचे यापूर्वी अनेक प्रताप समोर आले आहेत. केवळ १५ ते २० दिवसांत त्याच्यावर बीडमधील शिरूर कासार पोलीस ठाण्यात तीन गुन्हे दाखल करण्यात आले. आधी खोक्याने एका तरुणाला मारहाण केल्याचा व्हिडिओ व्हायरल झाला. त्यानंतरच त्याचा पैसे उधतानाचा व्हिडीओ देखील समोर आला. एवढे पैसे पाहून सारेच अचंबित झाले होते. पैसे कमावण्याचा मार्ग कोणता? यावरुन अनेक सवाल उपस्थित झाले. धक्कादायक म्हणजे आपल्या जातीची खोटी माहिती देऊन भाजपकडून पद मिळवल्याचा प्रताप देखील समोर आला आहे. त्याचे प्रताप समोर आल्यानंतर तो गेले काही दिवस फरार आहेत. पोलिसांनी तपासाची चक्र फिरवत खोक्याच्या मुसक्या आवळल्या आहेत.

खोक्या भोसलेविरोधात बीडसह अन्य राज्यांतील पोलीस ठाण्यातही गुन्हे दाखल आहेत. त्याच्याभोवती आता कारवाईचा फास आवळणार आहे. दरम्यान सतीश भोसलेच्या घरावर वनविभागाने छापा टाकला होता. यावेळी पोलिसांनी मोठं घबाड सापडलं होतं. खोक्याला शिकारीचा नाद आहे. हरिण, मोर यासह अन्य वन्यप्राण्यांचा शिकारीचाही त्याला नाद आहे. वनविभागाचे टीमने त्याच्या घरातून धारदार शस्त्रं, जाळी, वाघूर आणि बऱ्याच अन्य वस्तू जप्त केल्या. यानंतर वनविभाग आता अॅक्शन मोडवर आलं आहे. शिकारीच्या वस्तू सापडल्याने सतीशविरोधात वन्यजीव संरक्षण कायद्यांतर्गत गुन्हा दाखल झाला आहे. तर खोक्या भोसले वन विभागाच्या ज्या जागेत अतिक्रमण करून राहतो याविरोधात सुद्धा वनविभागाने गुन्हा दाखल केला आहे. यासंदर्भात खोक्याला नोटिस पाठवण्यात आली आहे. यावर सात दिवसांत दावा सिद्ध न केल्यास वनविभाग त्याच्यावर मोठी कारवाई करण्याची शक्यता आहे.