धनंजय मुंडे यांची राजकीय कारकीर्द

धनंजय मुंडे (Dhananjay Munde) यांचा जन्म बीड जिल्ह्यातील नाथरा गावात झाला आहे. दिवंगत नेते गोपीनाथ मुंडे यांचे पुतणे असलेले धनंजय मुंडे हे काकांचं बोट धरुन राजकारणात आले. त्यांनी भारतीय जनता पक्षाच्या युवा मोर्चातून राजकारणाचे धडे गिरवण्यास सुरुवात केली. सुरुवातीच्या काळात त्यांनी भाजयुमोचं अध्यक्षपद भूषवलं.

भारतीय जनता पक्षात धनंजय मुंडेंची कारकीर्द सुरु असतानाच गोपीनाथ मुंडेंनी त्यांची लेक पंकजा यांनाही राजकारणात आणलं आणि धनंजय यांची राजकीय कोंडी झाली. गोपीनाथ मुंडे यांनी आपला राजकीय वारसा लेकीकडे सोपवला. पक्षाने त्यांना परळीतून विधानसभेचं तिकिट दिलं आणि २००९ मध्ये त्या आमदार झाल्या.

भाजप सोडण्याचं कारण काय?

परळी नगरपरिषद अध्यक्ष पदाच्या निवडणुकीत धनंजय मुंडेंना आपल्या समर्थकाला उमेदवारी द्यायची होती, मात्र गोपीनाथ काकांनी विरोध केला. भाजपनेही त्यांचं ऐकलं नाही. त्यामुळे नाराज झालेल्या धनंजय मुंडेंनी भाजपला रामराम ठोकला आणि २०१२ मध्ये शरद पवार यांच्या राष्ट्रवादी काँग्रेसमध्ये प्रवेश केला. त्यांच्या पक्ष प्रवेशात अजित पवार यांची महत्त्वाची भूमिका राहिली होती. तेव्हापासूनच ते अजित पवार यांच्या खास मर्जीतील नेते मानले जाऊ लागले. २०१४ मध्ये त्यांनी परळीतून राष्ट्रवादीच्या तिकिटावर विधानसभा निवडणूक लढवली. परंतु पंकजा मुंडेंनी त्यांचा २५ हजारांहून अधिक मतांनी पराभव केला.
Dhananjay Munde Resigns : वैद्यकीय कारणास्तवही राजीनामा देतोय, धनंजय मुंडेंची सबब, मंत्रिपद सोडताच सविस्तर प्रतिक्रिया
विधानसभेला पराभव झाल्यानंतरही धनंजय मुंडेंना राष्ट्रवादी काँग्रेसने विधान परिषदेवर पाठवलं. त्यांना विरोधी पक्षनेतेपद देण्यात आलं. आपल्या वत्कृत्त्व शैलीच्या जोरावर मुंडेंनी भाषणं गाजवली. २०१९ मध्ये त्यांना पुन्हा एकदा पंकजा मुंडेंविरोधात पक्षानं संधी दिली. यावेळी त्यांनी ३० हजार मतांनी पराभव करत पंकजांकडून २०१४ च्या पराभवाचा बदला घेतला.
Dhananjay Munde Resignation : सुरेश धसांनी सांगितलं ते फोटोत जशास तसं; राजीनाम्याच्या दिरंगाईला जबाबदार फक्त… सुषमा अंधारे कडाडल्या

दादांची साथ

२०१९ मध्ये राज्यात महाविकास आघाडीचं सरकार आलं. त्यावेळी मुंडेंकडे सामाजिक न्याय विभागाची जबाबदारी देण्यात आली. जुलै २०२३ मध्ये अजित पवारांनी बंड केले. त्यांनी शरद पवारांची साथ सोडत महायुतीसोबत जाण्याचा निर्णय घेतला. यामध्ये मुंडेंनी अजित पवारांसोबत जाण्याचा निर्णय घेतला. त्यांना कृषीमंत्रिपद देण्यात आलं. २०२४ मध्ये झालेल्या लोकसभा निवडणुकीपूर्वी त्यांनी पंकजा मुंडेंसोबतचे मतभेद मिटवले. त्यांनी भाजपच्या उमेदवार असलेल्या पंकजा यांचा पूर्ण ताकदीनं प्रचार केला. पण त्या पराभूत झाल्या.

पुढे परळी विधानसभा मतदारसंघातून धनंजय मुंडे विधानसभेला उभे राहिले आणि विजयी झाले. महायुती सरकारमध्ये त्यांच्याकडे अन्न नागरी पुरवठा आणि ग्राहक संरक्षण विभागाचे मंत्रिपद देण्यात आले. मात्र संतोष देशमुख हत्या प्रकरणात आरोप झाल्यानंतर आता त्यांनी मंत्रिपदाचाही राजीनामा दिला आहे.