देवेंद्र फडणवीस काय म्हणाले?

“या घटनेत दुर्दैवाने एका विशिष्ट पक्षाचे काही पदाधिकारी आहेत, ज्यांनी अतिशय वाईट प्रकारचं काम केलं आहे. पोलिसांनी गुन्हा दाखल केला आहे. काहींना अटक केलेली आहे. इतरांनाही अटक केली जाईल. पण अशाप्रकारे सार्वजनिक ठिकाणी मुलींची छेडछाड करणे, त्यांना त्रास देणं हे अतिशय चुकीचं आहे. कुठल्याही परिस्थितीत अशा लोकांना माफी देता कामा नये. त्यांच्यावर अतिशय कडक कारवाई होईल”, अशी प्रतिक्रिया देवेंद्र फडणवीस यांनी दिली.

आमदार चंद्रकांत पाटील काय म्हणाले?

“अशा प्रकारची घटना कुठेही होत असेल तर त्याविरोधात कठोर कारवाई झाली पाहिजे ही माझी पहिली प्रतिक्रिया आहे. पण मुक्ताईनगर मतदारसंघात कुठेही काही झालं की, खडसे कुटुंबाने फक्त आमदार आणि आमदाराच्या माणसांचं नाव घ्यायचं हे मला पटत नाही. तुम्ही तक्रार केली आहे तर आता होऊद्या, दूध का दूध आणि पाणी का पाणी. पोलीस तक्रार झाली आहे, लोकांना अटक होईल, सगळं समोर येईल. पण आमदाराचं नाव घ्यायचं हे शिवसेनेचं नाव घ्याचं हे मला वाटतं राजकारण आहे”, असा आरोप मुक्ताईनगरचे आमदार चंद्रकांत पाटील यांनी केला.

“आरोपी हे आमच्या पक्षाचे आहेत का ते कन्फर्म केलं पाहिजे. छेडछाड करणारा जो असेल, क्लीप काढणारा कोण असेल त्याला कठोर शासन होईल तेवढं केलं पाहिजे. मग तो कुणाचाही कार्यकर्ता असो. या गोष्टीचं समर्थन कोण करणार नाही. समाजामध्ये चांगली छवी निर्माण करत असताना अशाप्रकारचं कृत्य कोणी करत असेल तर त्याला कठोर शिक्षा झाली पाहिजे या मताचे आम्ही सर्वजण आहोत”, अशी भूमिका चंद्रकांत पाटील यांनी मांडली.

‘मी सुद्धा देवेंद्र फडणवीस यांना भेटणार’

“या घटनेत शासन कारवाई करणार आहे. या प्रकरणी गुन्हा दाखल झाला आहे. सर्व आरोपी विशिष्ट पक्षाचे आहेत का? आरोपी कोणत्याही पक्षाचे असोत. विशिष्ट पक्षाचे पदाधिकारी हे आरोपी आहेत अशी माहिती देवेंद्र फडणवीस यांना सांगितली गेली असेल त्यामुळे ते तसं बोलले असतील. मी सुद्धा त्यांची भेट घेऊन त्यांना काही गोष्टी सांगणार आहे”, असं चंद्रकांत पाटील म्हणाले.

“या प्रकरणातील 6 आरोपी आहेत. त्यापैकी 2 आरोपी तर भाजपशी संबंधित आहेत. मग तो आरोपी भाजप पक्षाचा झाला का? अशा पद्धतीने कुणाला बदनाम केलं जात असेल तर ते चांगलं नाही. कोणतीही घटना झाली की आमदारांचं नाव घेतात”, अशी टीका चंद्रकांत पाटील यांनी केली.