सोलापूर रेल्वे स्थानकावर बनावट ग्राहक पाठवून रचला सापळा

तिन्ही संशयित आरोपी हे बीड जिल्ह्यातील आहेत. सोलापूर वनविभागाने सापळा रचला आणि बनावट ग्राहक पाठवून कारवाई केली आहे. रविवारी सकाळपासून सोलापूर रेल्वे स्थानकावर वनविभागाने सापळा लावला होता. तीन संशयित आरोपी एका चारचाकी गाडीमधून घोरपडीचे गुप्तांग विक्रीसाठी घेऊन आले होते. रेल्वेस्टेशनवर आल्यावर ठरल्याप्रमाणे खबरी याने त्यांना ओळखले व वन विभागाच्या अधिकाऱ्यांनी तात्काळ त्यांना पकडून ताब्यात घेतले व झाडाझडती घेतली असता त्यांच्याकडे १५१ घोरपडीचे गुप्तांग आढळून आले आहेत.
Jalgaon Crime: सासऱ्यांना शर्टाचं बटणही लावता येईना, ते हत्या कसे करतील? रील स्टारच्या पत्नीचा खळबळजनक दावा

१९७२ मधील वन्य प्राण्यांना अतिशय उच्च दर्जाचे संरक्षण

वन विभागाने ताब्यात घेतलेले संशयीत आरोपी सराईत आहेत. त्यांच्याकडून असे यापूर्वीही असे कृत्य झाले असल्याचे प्राथमिक चौकशीत समोर आले आहे. घोरपड वन्यप्राणी हा वन विभागाच्या वन्यजीव संरक्षण कायदा १९७२ अंतर्गत शेड्युल एक मध्ये येत आहे. घोरपडीला अतिउच्च दर्जाचे संरक्षण देण्यात आलेले आहे. घोरपडीची शिकार करणे व विक्री करणे याला दहा हजार रुपये दंड व सात वर्षे सक्त मजुरी अशी शिक्षा आहे. १९७२ मध्ये वन्य प्राण्यांच्या सुरक्षेसाठी कायदा पारित करण्यात आला आहे, तरीही वन्य प्राण्यांची शिकार केली जाते.

घोरपड गुप्तांग प्रकरणात तामिळनाडू कनेक्शन; धागेदोरे बीड अन् सोलापूरपर्यंत

तामिळनाडू राज्यात घोरपडीचे गुप्तांग विक्री करताना संशयित इसमांना ताब्यात घेतले आहे. तामिळनाडूमध्ये तपास करताना सोलापूर आणि बीड नाव समोर आले. साताऱ्यातील वन्यजीव रक्षकांची मदत घेत सोलापूर रेल्वे स्थानकावर कारवाई करण्यात आली आहे. बीड जिल्ह्यातील विठ्ठल पाटोळे, सुग्रीव पाटोळे आणि बाळासाहेब डोरले या तिघांना ताब्यात घेण्यात आले आहे.

१५१ गुप्तांगासाठी त्यांनी किती घोरपडी मारल्या असतील?

घोरपडीचे १५१ गुप्तांग वन विभागाने जप्त केले आहे. त्यासाठी संशयित आरोपींनी किती घोरपडी मारल्या असतील याचा अंदाज लावणे अवघड आहे. घोरपडीचे गुप्तांग तांत्रिक मांत्रिक मोठमोठ्या किमतीत विकत घेतात. जादूटोणा करण्यासाठी घोरपडीचे गुप्तांग वापरले जाते, तसेच पुरुषांचे वंध्यत्व निवारण करण्यासाठी देखील याचा उपयोग होतो, असेही म्हटले जाते. या तिघा संशयित आरोपींकडून १५१ गुप्तांग जप्त करण्यात आले. हजारो घोरपडींची शिकार करत नर प्रजातीच्या घोरपडीचे गुप्तांग बाजूला करत हे गुप्तांग जमा केल्याचे प्राथमिक तपासातून समजते.

वन्यजीव कायद्याअंतर्गत कारवाई

सोलापूर रेल्वे स्थानकात ही कारवाई करण्यात आली. अप्पर प्रधान मुख्य वनसंरक्षक डॉ. क्लेमेंट बेन, मुख्य वनसंरक्षक एन आर प्रवीण, उपवनसंरक्षक महादेव मोहिते, सोलापूर वन विभागाचे सहाय्यक वनसंरक्षक अजित शिंदे, वनक्षेत्रपाल रोहितकुमार गांगर्डे आणि वनपालांच्या टीमने ही कारवाई केली आहे. वनविभागाने या संशयितांवर वन्य जीव संरक्षण अधिनियम १९७२ अंतर्गत कलम २/२, ९, ३९, ४०, ४८ अ,४९अ व ब,५०, ५१, ५७ अंतर्गत वन गुन्हा दाखल केला आहे. याप्रकरणी अधिक तपास सुरू आहे.