आधी नरिमन पॉईंट ते वांद्रे असा प्रवास करायचा म्हणलं तर एक ते दीड तास लागत होता. सोमवारपासून कोस्टल रोडमुळे मुंबईकरांच्या प्रवासाला वेग येणार आहे. राज्य सरकारच्या म्हणण्यानुसार हा रस्ता मुंबईकरांसाठी सकाळी ७ ते मध्यरात्री १२ वाजेपर्यंत खुला राहणार आहे. या किनारपट्टी रस्त्याची एकूण लांबी १०.५८ किमी एवढी आहे. मुख्यमंत्री फडणवीस यांच्या हस्ते उद्घाटन झाल्यानंतर आता मुंबईकरांना मरीन ड्राईव्ह ते दहिसर हा वेस्टर्न एक्स्प्रेस हायवे कोस्टल रोड, वरळी-वांद्रे सी लिंक मार्गे सिग्नल मोफत प्रवास करता येणार आहे. त्यामुळे मुंबईकरांचा प्रवास आाता वेगवान आणि सोयीस्कर होणार आहे.

मुंबईकर गेल्या ७ वर्षांपासून या सागरी रस्त्याच्या प्रतिक्षेत होते. त्याची मुदत वाढवल्यामुळे बांधकाम खर्च ८ हजार कोटी रुपयांवरून १३ हजार कोटी रुपयांपर्यंत वाढला आहे. कोस्टल रोडचे बांधकाम ऑक्टोबर २०१८ मध्ये सुरू झाले होते. जेव्हा महापालिकेने डिसेंबर २०२३ मध्ये तो खुला करण्याचा दावा केला होता. परंतु संपूर्ण कोस्टल रोड जानेवारी २०२५ मध्ये उघडला जाऊ शकतो, असे सांगण्यात आले. राज्य सरकारने या सागरी रस्त्याला धर्मवीर स्वराज्यरक्षक छत्रपती संभाजी महाराज मुंबई कोस्टल रोड असे नाव दिले आहे. मुख्यमंत्री फडणवीस यांच्या हस्ते उत्तरेकडील भागाचे उद्घाटन करण्यात आले. कोस्टल रोडमुळे मुंबईकरांचा प्रवासाचा वेळ आणि इंधनाची बचत होणार असून, प्रदूषणापासून सुटका करण्यात महत्त्वाची भूमिका बजावणार असल्याचे मुख्यमंत्री देवेंद्र फडणवीस यांनी सांगितले.

यावेळी मुख्यमंत्री फडणवीस यांनी नमूद केले की, मुंबई कोस्टल रोडचे ९४ टक्के काम पूर्ण झाले आहे. तर उत्तरवाहिनी रोडचे आज उद्घाटन करण्यात आले. प्रजासत्ताक दिनी हा रस्त्याचे लोकार्पण करण्यात येत आहे. हा मार्ग २७ जानेवारीपासून इतर तीन अंतर्गत मार्गांसह खुला होणार आहे. मरीन ड्राइव्ह ते प्रभादेवी इंटरलेन, मरीन ड्राइव्ह ते बिंदुमाधव ठाकरे चौक आणि बिंदुमाधव ठाकरे चौक ते सागरी सेतू आणि वांद्रेकडे जाणाऱ्या इंटरलेनचा यात समावेश असणार आहे.