परळीतील जगमित्र याच कार्यालयातून वाल्मिक कराड हा धनंजय मुंडे यांच्या मतदारसंघातील नागरिकांचे प्रश्न सोडवत होता. वाल्मिक कराडच्या खुर्चीवर आता धनंजय मुंडे यांचे भाऊ अजय मुंडे बसणार असून जगमित्र कार्यालयाची सूत्रे अजय मुंडे सांभाळणार आहेत.

अजय मुंडे जिल्हा परिषदेचे सदस्य असून गटनेते देखील आहेत. पिंपरी जिल्हा परिषद गटातून ते विजयी झाले होते. तर धनंजय मुंडे यांच्या अनुपस्थितीत मतदारसंघात ते सक्रिय होते. सध्या वाल्मिक कराड न्यायालयीन कोठडीत असताना जगमित्र कार्यालयाची सूत्रे कोण हाती घेणार हा प्रश्न होता. मात्र अजय मुंडे यांनी या ठिकाणी कामाला सुरुवात केली आहे.

धनंजय मुंडे राज्याचे नेतृत्व करत असताना परळी मतदारसंघातील नागरिकांच्या समस्या सोडविण्यासाठी वाल्मिक कराड अग्रेसर होता. मात्र, मागील दीड महिन्यांपासून जगमित्र कार्यालय ओस पडले होते. आता अखेर याच कार्यालयाची सूत्रे अजय मुंडेंकडे आली आहेत.

संतोष देशमुख अपहरण, खंडणी आणि हत्या प्रकरणात मकोका अंतर्गत गुन्हा दाखल असलेला वाल्मिक कराड सध्या सीआयडी कोठडीत आहे. सध्या या प्रकरणात सीआयडीकडून वाल्मिक कराडची चौकशी सुरु असून त्याच्याविरोधात अनेक पुरावे, व्हिडिओ आणि कॉल रेकॉर्डिंगही सापडले आहे. तर, दिवसेदिवस वाल्मिक कराडच्या अडचणींमध्ये वाढ होताना दिसून येत आहे. पुण्यात त्याच्या अनेक मालमत्ता असल्याचंही समोर आलं आहे.