Pune News : पुण्यातील एका तरूणी पर्यटनासाठी गोव्याला गेली होती. मात्र तिची ती अखेरची ट्रिप ठरली. तिने विचारनेही केला नसेल तिच्यासोबत असं काही घडणार आहे. तरूणीसोबत काय घडलं जाणून घ्या.
नेमकं काय घडलं?
‘पॅराग्लायडिंग’ करताना झालेल्या दुर्घटनेत पुण्यातील पर्यटक तरुणी आणि प्रशिक्षकाचा दरीत कोसळून मृत्यू झाल्याची घटना उत्तर गोव्यात घडली. शनिवारी संध्याकाळी केरी गावात हा अपघात झाल्याचे पोलिसांनी रविवारी सांगितले. पुण्यातील रहिवासी शिवानी डाबले (२७) आणि तिचे प्रशिक्षक सुमल नेपाली (२६) अशी मृतांची नावे आहेत. नेपाली हा नेपाळचा नागरिक होता. शनिवारी संध्याकाळी ४.३० ते ५च्या दरम्यान उत्तर गोव्यातील केरी पठारावर हा अपघात घडल्याची माहिती पोलिसांनी दिली. शिवानीने बेकायदा कार्यरत असलेल्या ‘हाइक एन फ्लाय’ या साहसी क्रीडा कंपनीसोबत पॅराग्लायडिंग करण्याचा निर्णय घेतला होता.
‘पॅराग्लायडर’ने उड्डाण केल्यावर ते लगेचच दरीत कोसळले. पॅराग्लायडरचा एक दोर तुटल्याने ते वेगवेगळ्या खडकांवर धडकले. त्यामुळे गंभीर जखमी झालेल्या दोघांनाही तातडीने गोवा मेडिकल कॉलेजमध्ये नेण्यात आले. तिथे डॉक्टरांनी त्यांना मृत घोषित केले, असे पोलिसांनी सांगितले आहे. मानवी जीवाला धोका निर्माण केल्याप्रकरणी संबंधित कंपनीचे मालक शेखर रायझादा यांच्या विरोधात मांद्रे पोलिस ठाण्यात भारतीय न्याय संहितेच्या कलम १०५नुसार गुन्हा दाखल करण्यात आला आहे.
सोशल मीडियावर ‘पॅराग्लायडिंग’ करतानाचे अनेक रिल्स व्हायरल होतात. त्यामुळे प्रत्येकाच्या मनात एकदा या साहसी प्रकाराचा अनुभव घेण्याची इच्छा होते. परंतु असा जीवघेणा साहसी प्रकार करताना काळजीसुद्धा तितकीच महत्त्वाची आहे.
लेखकाबद्दलहरिश मालुसरे महाराष्ट्र टाइम्स ऑनलाईन टीममध्ये सिनिअर डिजिटल कंटेंट प्रोड्युसर म्हणून कार्यरत. क्रीडा, राजकीय आणि क्राईम बातम्यांमध्ये विशेष आवड. झी 24 तास आणि टीव्ही9 मराठीसह पत्रकारिता क्षेत्रात 04 वर्षांचा अनुभव.… आणखी वाचा