राज्य सरकारतर्फे नुकत्याच जाहीर करण्यात आलेल्या पालकमंत्र्यांच्या निर्णयानंतर महायुतीत वादाची ठिणगी पडली होती. रायगड आणि नाशिक जिल्ह्याचे पालकमंत्रिपद शिवसेनेच्या वाट्याला न आल्याने उफाळलेल्या नाराजीवर अखेर रविवारी रात्री उशिराने तात्पुरता तोडगा निघाला आहे. रविवारी दिवसभर शिवसेनेच्या नेत्यांनी या संदर्भात नाराजी व्यक्त केल्यानंतर रायगड आणि नाशिक जिल्ह्याच्या पालकमंत्रिपदाच्या निर्णयाला स्थगिती देण्याचा निर्णय जाहीर करण्यात आला आहे. या संदर्भातील शासन निर्णय रविवारी सरकारच्या सामान्य प्रशासन विभागाने जाहीर केला आहे.

राज्य मंत्रिमंडळाच्या नव्या पालकमंत्रिपदाची घोषणा शनिवारी करण्यात आली होती. यात बहुचर्चित रायगडच्या पालकमंत्रिपदाची धुरा राष्ट्रवादीच्या अदिती तटकरे यांच्याकडे, तर नाशिकचे पालकमंत्रिपद गिरीश महाजन यांच्याकडे सोपविण्यात आले होते. एकीकडे रायगड जिल्ह्याच्या पालकमंत्रिपदासाठी शिवसेना शिंदे गटाचा आग्रह होता. भरत गोगावले यांना या ठिकाणी पालकमंत्रिपद मिळेल, अशी अपेक्षा व्यक्त केली जात होती. मात्र, गोगावले यांना डावलून पुन्हा अदिती तटकरे यांना रायगडचे पालकमंत्री करण्यात आले. त्यामुळे गोगावले यांच्या समर्थकांनी आक्रमक पवित्रा घेतला होता.

दरम्यान, आता दोन पालकमंंत्रीपदी इच्छुकांची वर्णी लागते का हे पाहणं महत्त्वाचं ठरणार आहे. काही वेगळा निर्णय घेतला जातो का हेसुद्धा पाहावं लागणार आहे.