अकोला शहरातील लहान उमरी येथील खंडारे परिवारातील ८२ वर्षांच्या वत्सलाबाई मोतीराम खंडारे आणि ८० वर्षांच्या भागीरथीबाई जोतिराम खंडारे या दोन जावांनी अखेरचा श्वासही पाठोपाठ घेतल्याची हृदयद्रावक घटना समोर आली आहे. या दोन जावांची अंत्ययात्राही सोबतच निघाली. सोमवारी सायंकाळी त्यांच्यावर उमरी येथील स्मशानभूमीत अंत्यसंस्कार पार पडले.
Uttarakhand News: पोलीस काका, तिकडे बघा..; निष्पाप चिमुकली मुलं बोलली, पलंग उघडताच अधिकाऱ्यांना धक्का
मोठी जाऊ वत्सलाबाई मोतीराम खंडारे, तसेच लहान जाऊ भागीरथीबाई जोतिराम खंडारे सुरुवातीच्या एकत्र कुटुंबपद्धतीत असल्याने वत्सलाबाई आणि भागीरथीबाई यांनी मोठ्या संस्काराने आणि प्रेमाने एकत्र कुुटुंबाचा गाढा ओढला. सुरुवातीच्या काळात परिस्थिती बेताची असल्याने त्यांनी संकटावर मात करत आपल्या कुटुंबाचे भरण पोषण केले. त्यांनी डॉक्टर पंजाबराव देशमुख कृषी विद्यापीठात मजुरी करुन आपल्या मुलांना उच्चविद्या विभूषित केले.

दोघीही अखेरपर्यंत मैत्रिणीसारख्या राहिल्या. अखेरचा श्वासही त्यांनी सोबतच घेत जेठानी वत्सलाबाई व जावू भागीरथीबाई या दोघींनी ३० डिसेंबरला दोन तासाच्या फरकाने जगाचा निरोप घेतला. त्यांच्या निधनाची बातमी वाऱ्यासारखी पसरताच परिसरात व नातेवाईकही हळहळले. त्यानंतर या दोघींचेही अंत्यसंस्कार सोबतच करण्याचे ठरले. त्यानुसार दोघींची अंत्ययात्राही एकत्र निघाली. त्यांची निघालेली अंत्ययात्रा पाहून अनेकांचे मन हेलावले. दोघींवरही सोबतच उमरी स्मशानभूमीत अंत्यसंस्कार पार पडले. त्यांच्या अंत्ययात्रेला शहरातील तसेच जिल्ह्यातील गणमान्य व्यक्तींनी हजेरी लावली होती.

सोमवारी ३० डिसेंबरच्या पहाटे जाऊ भगिरथाबाई यांचे निधन झाले. त्यांच्या निधनाची वार्ता कानावर पडताच मोठी जाऊ वत्सलाबाई यांनाही धक्का बसला. दोन तासानंतर त्यांचीही प्राणज्योत मालवली.