मंत्रिमंडळ विस्तारात राष्ट्रवादी काँग्रेसच्या वाट्याला ९ मंत्रिपदं आली. राष्ट्रवादीचे राष्ट्रीय अध्यक्ष अजित पवारांनी काहींना डच्चू देत त्यांच्या जागी नव्या चेहऱ्यांना संधी दिली. बारामती लोकसभा मतदारसंघात येणाऱ्या इंदापूर विधानसभा मतदारसंघाचे आमदार असलेल्या दत्तात्रय भरणेंना मंत्रिमंडळात स्थान देण्यात आलं. त्यांना क्रीडा मंत्रालय देण्यात आलं. याआधीच्या सरकारमध्ये हे खातं राष्ट्रवादी काँग्रेसच्याच संजय बनसोडे यांच्याकडे होतं. बनसोडे यांना फडणवीस सरकारच्या मंत्रिमंडळात स्थान मिळालेलं नाही.
भरधाव टेम्पोनं घाटकोपरमध्ये ५ ते ६ जणांना चिरडलं, एका महिलेचा मृत्यू; चालक ताब्यात
क्रीडा मंत्रालय मिळाल्यानं दत्तात्रय भरणे नाराज असल्याचं कळतं. त्यामुळेच त्यांनी अद्याप मंत्रिपदाचा कार्यभार हाती घेतलेला नाही. खातेवाटप होऊन आठवडा उलटला आहे. पण भरणेंनी मंत्रिपदाची जबाबदारी स्वीकारलेली नाही. त्यामुळे त्यांच्या नाराजीची चर्चा जोर धरु लागली आहे. भरणे त्यांच्या कुटुंबासह परदेशात सुट्टीवर गेले आहेत. कार्यकर्ते त्यांच्याशी संपर्क करण्याचा प्रयत्न करत आहेत. पण भरणे परदेशात असल्यानं त्यांच्याशी संपर्क होत नाहीए.

दत्तात्रय भरणे सलग तिसऱ्यांदा इंदापूरमधून विजयी झाले आहेत. त्यांनी सलग तीनदा हर्षवर्धन पाटील यांचा पराभव केला आहे. पाटील १९९५ ते २०१४ अशी १९ वर्षे इंदापूरचे आमदार राहिले. या कालावधीत त्यांनी अनेक मंत्रिपदं भूषवली. अजित पवारांचा पाटील यांच्याशी कायमच संघर्ष राहिला. त्यातूनच त्यांनी इंदापुरात भरणेंच्या पाठिशी ताकद उभी केली. अखेर २०१४ मध्ये भरणेंनी पाटील यांना पराभवाचा धक्का दिला. २०१९ मध्येही त्यांना पाटलांना धूळ चारली.
पुणे-दानापूर ट्रेनच्या चाकांमध्ये झोपून तरुणाचा २५० किमी प्रवास; रेल्वे कर्मचारी चक्रावले
राज्यात २०१९ मध्ये महाविकास आघाडीचं सरकार आलं. मुख्यमंत्री उद्धव ठाकरेंच्या सरकारमध्ये त्यांना सार्वजनिक बांधकाम (सार्वजनिक उपक्रम वगळून), मृदा आणि जलसंधारण, वन, पशुसंवर्धन, मत्स्योद्योग, ओबीसी विकास या खात्यांचं राज्यमंत्रिपद देण्यात आलं होतं. यासोबतचे सोलापूरचे पालकमंत्रिदेखील होते.