मिळालेल्या माहितीनुसार, पाचोरा तालुक्यातील वरसाडे तांडा येथील विजय भिमा राठोड हा २५ वर्षीय तरुण २४ फेब्रुवारीच्या रात्री घरातून निघून गेला आणि नंतर तो बेपत्ता झाला होता. त्यानंतर विजय राठोड याचा भाऊ संजय राठोड यांनी दिलेल्या तक्रारीवरून २६ फेब्रुवारी रोजी पिंपळगाव हरेश्वर पोलीस ठाण्यात तरुण बेपत्ता असल्याची तक्रार दाखल करण्यात आली होती.

याप्रकरणी पोलिसांनी तपास सुरू केल्यानंतर तांत्रिक माहितीच्या आधारे संजय परशुराम जाधव याला चौकशीसाठी बोलावण्यात आलं. संजय जाधव याने चौकशीदरम्यान उडवाउडवीची उत्तरे दिली. परंतु पोलिसी खाक्या दाखवल्यानंतर त्याने गुन्हा मान्य केला. माझी पत्नी सोनाली जाधव हिचे विजय राठोडशी प्रेमसंबंध असल्यामुळी मी आणि पत्नीने मिळून त्याचा खून केला, अशी कबुली संशयित आरोपींनी दिली आहे.

आरोपींच्या वेगवेगळ्या दाव्यांनी संभ्रम

विजय राठोड या तरुणाला कसं संपवलं आणि त्याच्या मृतदेहाची विल्हेवाट कशी लावली, याबाबत संशयित जाधव पती-पत्नी पोलिसांना वेगवेगळी माहिती देत आहे. कधी गळा आवळल्याचे तर कधी लोखंडी शस्त्राने वार केल्याचा दावा ते करत आहेत. तसंच हत्येनंतर विजय राठोड याचा मृतदेह जाळला आणि जंगलात फेकला असे परस्परविरोधी दावेही केले जात आहेत. त्यामुळे पोलिसांकडून अधिक चौकशी सुरू असून सहाय्यक पोलीस निरीक्षक कल्याणी वर्मा या प्रकरणाचा अधिक तपास करत आहेत.