‘मी तुझ्या आईला मारून टाकीन’

आरोपी अमृत मेघा सोलंकी (वय 58) हा धारावी कोळीवाडा येथील जांबा पास्कल चाळीत आपली पत्नी सूरजबेन सोलंकी (वय 52) सोबत राहत होता. 13 मार्च शुक्रवारी रोजी दुपारी 2:30च्या सुमारास ही घटना घडली. अमृतने पत्नीच्या डोक्यात पाण्याची बॉटल मारून आणि नंतर ओढणीने गळा आवळून तिची हत्या केली. त्यांचा मुलगा शिवराम सोलंकी (वय 33) याने दिलेल्या तक्रारीनुसार, त्याचे वडील गेल्या तीन वर्षांपासून आईचा छळ करत होते. ‘आई आणि मुले मिळून माझ्यावर जादूटोणा करतात आणि मुले फक्त आईलाच साथ देतात,’ असा अमृतचा समज होता. त्याने आपल्या मुलांना घरात येण्यासही बंदी घातली होती. 11 मार्च बुधवारी रोजी झालेल्या एका वादात अमृतने ‘एके दिवशी मी तुझ्या आईला मारून टाकीन,’ अशी धमकीही दिली होती.

रक्ताच्या थारोळ्यात बायकोची बॉडी

11 मार्च बुधवारी रोजी एका नातेवाईकाच्या अंत्यविधीला जाण्यासाठी शिवराम वडिलांना घेण्यासाठी घरी पोहोचला. घर आतून बंद होते आणि वारंवार हाक मारूनही प्रतिसाद मिळत नव्हता. शिवरामने वडिलांना फोन केला असता, अमृतने व्हिडिओ कॉल उचलण्यास सांगितला. व्हिडिओ कॉल सुरू होताच शिवरामच्या पायाखालची जमीन सरकली. त्याचे वडील रक्ताने माखलेले होते. अमृतने कॅमेरा फिरवून रक्ताच्या थारोळ्यात पडलेल्या बायकोची बॉडी दाखवली आणि मोठ्यानं सांगितलं की, ‘सगळ्यांना बोलव, मी तुझ्या आईला बाटलीने मारून आणि गळा दाबून संपवलं आहे.’

शिवरामचा आरडाओरडा ऐकून शेजारचे लोक जमा झाले आणि त्यांनी पोलिसांना पाचारण केले. धारावी पोलिसांनी घटनास्थळी धाव घेत सूरजबेन यांना सायन रुग्णालयात नेलं, मात्र, डॉक्टरांनी त्यांना मृत घोषित केलं. पोलिसांनी हत्येचा गुन्हा दाखल करून अमृत सोलंकीला अटक केली आहे. या प्रकरणाचा अधिक तपास सुरू आहे.