याबाबत मिळालेली माहिती अशी, की हवेली तालुक्यातील पिसोली येथून धर्मेंद्र देशमुख हे त्यांच्या सहकारी शिक्षकांसह एकूण १३ जण गुरुवारी पहाटे चार वाजता एका खासगी ट्रॅव्हल्स बसने निघाले होते. सकाळी अकराच्या सुमारास सर्व जण काशीद समुद्र किनारी आले होते. यावेळी सर्वांना काशीद समुद्राचे पाणी बघून पोहण्याचा मोह आवरता आला नाही. धर्मेंद्र देशमुख आणि त्यांचे सहकारी हे समुद्रात आंघोळीसाठी गेले. मात्र धर्मेंद्र देशमुख यांना पाण्याचा अंदाज न आल्यामुळे ते बुडू लागले. धर्मेंद्र देशमुख हे बुडत असल्याचं समजल्यानंतर काशीद समुद्र किनारी असणारे जीव रक्षक दलाच्या सदस्यांनी त्यांना पाण्यातून बाहेर काढून स्पीड बोटीद्वारे समुद्र किनारी आणलं.
मुंबईकरांची चिंता वाढली! वायू प्रदूषण धोकादायक स्तरावर; या भागात सर्वात खराब हवामान
पाण्यातून बाहेर काढल्यानंतर धर्मेंद्र देशमुख बेशुद्ध अवस्थेत होते. त्यामुळे त्यांना बोर्ली येथील प्राथमिक आरोग्य केंद्रात आणलं. मात्र तिथे वैद्यकीय अधिकाऱ्यांनी त्यांना तातडीने अधिक उपचारासाठी अलिबाग येथील जिल्हा रुग्णालयात पाठवण्याचं सांगितलं. जिल्हा रुग्णालयात धर्मेंद्र देशमुख यांना वैद्यकीय अधिकारी सुरक्षा म्हात्रे यांनी तपासलं आणि दुपारी दोन वाजून ५५ मिनिटांच्याच्या सुमारास मृत घोषित केलं.

मोठ्या संख्येने पर्यटक काशीद समुद्र किनारी येत असून पोहणाऱ्यांची संख्याही मोठी आहे. मात्र पाण्याचा अंदाज न आल्याने पर्यटनासाठी आलेल्या धर्मेंद्र देशमुख (वय ५५ वर्षे, मूळ राहणार, आंबले, तालुका-शिरूर, जिल्हा पुणे, सध्या राहणार महात्मा ज्योतिबा फुले हायस्कूल, पिसोली, तालुका हवेली, पुणे) यांच्या कुटुंबावर दुःखाचा डोंगर कोसळला आहे. या घटनेचा अधिक तपास मुरुड पोलीस करत आहेत.
लाडकी बहिण योजनेमुळे शिक्षकांचे पगार रखडले, महिन्याच गणित बिघडलं; वेतन रखडल्याने शिक्षक संतापले

काशीद समुद्रकिनारा ठरतोय जीवघेणा

जगाच्या नकाशावर रायगड जिल्ह्यातील काशीद समुद्रकिनाऱ्याची नोंद आहे. या समुद्रकिनाऱ्याला पर्यटकांची मोठी पसंती मिळते. सुट्टीच्या दिवशी मुंबई, पुणे औरंगाबादसह वेगवेगळ्या राज्यांतील, देश-विदेशांतील पर्यटक या ठिकाणी फिरण्यासाठी येतात. किनाऱ्यावरील टेहळणी टॉवर जीर्ण झाले आहेत. किनाऱ्यावर पर्यटकांना सतर्क ठेवण्यासाठी सायरनचा अभाव आहे. तसंच अपुऱ्या सुरक्षा रक्षकांमुळे किनाऱ्यावरील सुरक्षा वाऱ्यावर असल्याचं चित्र दिसून येत आहे.

हजारोंच्या संख्येने या ठिकाणी पर्यटक येतात. परंतु प्रशासनाकडून आवश्‍यक सुविधा उपलब्ध नसल्याने त्याचा फटका पर्यटकांना बसत आहे. दरवर्षी समुद्रकिनारी पर्यटक बुडण्याच्या घटना घडत असतानाही याची प्रशासन गांभीर्याने दखल का घेत नाही, असा सवाल नागरिकांकडून उपस्थित केला जात आहे.