म. टा. प्रतिनिधी, नाशिक : राज्याची सत्ता हाकणाऱ्या महायुतीमधील तीन राजकीय पक्षांचे सूर नाशिकचा उमेदवार निश्चित करण्याबाबत अद्याप जुळू शकलेले नाहीत. दुसरीकडे उमेदवारीबाबत हिरवा कंदील मिळालेला नसतानाही खासदार हेमंत गोडसे यांनी प्रचाराचा जाहीर प्रारंभ केला असून, दिल्लीतील भाजपश्रेष्ठींचा निवडणूक लढवण्याचा आग्रह असल्याचे सांगत राष्ट्रवादीचे ज्येष्ठ नेते छगन भुजबळ यांनीही उमेदवारीवर दावा केला आहे. महसूलमंत्री राधाकृष्ण विखे यांनीही नाशिकची जागा भाजपला मिळाल्यास विजय निश्चित असल्याचे सांगत पक्षाचा उमेदवारीवरील दावा कायम असल्याचेच अधोरेखित केले आहे. तिन्ही पक्षांचे एकमत होत नसल्याने जागेचा तिढा सोडवणे हे महायुतीपुढे मोठे आव्हान ठरले आहे.यंदाच्या लोकसभा निवडणुकीत नाशिक मतदारसंघ राज्यातच नाही, तर देशात चर्चेत आहे. कधी नव्हे ते उमेदवारी निश्चितीचा तिढा थेट दिल्ली दरबारी पोहोचला असून, मागील पंधरवड्यापासून महायुतीमध्ये उमेदवारीबाबत खल सुरू आहे. जागावाटपात नाशिक लोकसभेची जागा शिवसेनेकडे आहे. त्यामुळे विद्यमान खासदार हेमंत गोडसे यांनी उमेदवारी निश्चित मानून रंगपंचमीच्या निमित्ताने जाहीर प्रचाराला सुरुवात केली आहे. शालिमार येथील हनुमान मंदिरात दुग्धाभिषेक करून व प्रचारपत्रक ठेवून गोडसे यांनी प्रचाराला जाहीर सुरुवात केली आहे. दुसरीकडे आपण उमेदवारी करावी, असा भाजपचा आग्रह असल्याचे सांगत राष्ट्रवादीचे ज्येष्ठ नेते छगन भुजबळ यांनीदेखील उमेदवारीबाबतच्या मुद्द्याला वळण दिले आहे. नाशिकमध्ये महापालिकेसह विधानसभा मतदारसंघांमध्ये भाजपचे वर्चस्व असल्याने महसूल मंत्री राधाकृष्ण विखे यांनी या जागेवर दावा सांगितला आहे. नाशिकमध्ये भाजपचा उमेदवार निश्चितच विजयी होईल, असा विश्वास व्यक्त करीत पक्षासाठी जागा मागण्यात गैर नसल्याची रोखठोक भूमिकाही मांडली आहे.
रेल्वे प्रवाशांसाठी खुशखबर, साप्ताहिक विशेष गाड्यांना मुदतवाढ; कोणत्या गाड्यांचा समावेश

भाजप, शिवसेना (शिंदे गट) आणि राष्ट्रवादी काँग्रेसचा अजित पवार गट यांचे उमेदवारीबाबतचे सूर जुळत नसल्याने कार्यकर्त्यांमधील संभ्रमही वाढत चालला आहे.

दिंडोरीत भारती पवारांविरुद्ध भास्कर भगरे

सरपंच म्हणून आपल्या राजकीय कारकिर्दीला सुरुवात करणारे दिंडोरीतील भास्कर भगरे यांच्या गळ्यात लोकसभा मतदारसंघाच्या उमेदवारीची माळ पडली आहे. दिंडोरी लोकसभा मतदारसंघामध्ये भाजपच्या केंद्रीय आरोग्य राज्यमंत्री डॉ. भारती पवार यांना यापूर्वीच महायुतीने उमेदवारी जाहीर केली आहे. पवारांच्या विरोधात महाविकास आघाडी कुणाला उमेदवारी देणार याबाबत राजकीय पक्षांसह मतदारांमध्येही उत्सुकता होती. शरद पवार यांचे समर्थक मानल्या जाणारे व कौटुंबिक राजकीय पार्श्वभूमी नसलेले भगरे यांना राष्ट्रवादी काँग्रेस शरदचंद्र पवार पक्षाने उमेदवारी जाहीर केली आहे. सरपंचपदापासून सुरू झालेला भगरे यांचा प्रवास पंचायत समिती सभापती, जिल्हा परिषद सदस्यपदासह आता लोकसभेच्या उमेदवारीपर्यंत येऊन पोहोचला आहे.