निलेश पाटील, जळगाव: निवडणुकीचा बिगुल वाजला असला तरी महाविकास आघाडी तर्फे उमेदवार जाहीर करण्यात आलेला नाही. त्यातच रावेर लोकसभा मतदारसंघात आज रोहिणी खडसे यांनी तडकाफडकी शरद पवारांची भेट घेतली असून रावेर मतदार संघात नणंद-भावजय लढत होणार असल्याचे चित्र दिसून येत आहे.
रावेर लोकसभा मतदारसंघांमध्ये महाविकास आघाडीतर्फे उमेदवाराची अनिश्चितता दिसून येत आहे. यातच भाजपाने विद्यमान खासदार रक्षा खडसे यांना तिसऱ्यांदा उमेदवारी देऊन पुन्हा खडसे परिवाराचे वर्चस्व असल्याचे सिद्ध करून दाखवले आहे. मात्र ,रक्षा खडसे यांच्या उमेदवारीला रावेर, यावल, चोपडा, बोदवड, जामनेर आणि वरणगाव या मतदारसंघांमधून तीव्र असा विरोध दिसून येत आहे. भाजप ऐनवेळेस उमेदवार बदलण्याच्या हालचाली करणार अशाही चर्चा सध्या रंगू लागल्या आहेत.
आज रोहिणी खडसे यांनी पुणे येथे शरद पवार यांची भेट घेतली. मात्र, या भेटीबाबत रोहिणी खडसे यांनी माध्यमांशी बोलणे टाळले आहे. रावेर मतदारसंघात भाजपला तगडे आव्हान देण्यासाठी महाविकास आघाडीकडून प्रबल दावेदाराचा शोध सुरू आहे. रोहिणी खडसे यांनाही उमेदवारी मिळण्याची दाट शक्यता वर्तवली जात आहे. जर रोहिणी खडसे यांना उमेदवारी मिळाली तर बारामती प्रमाणेच रावेर मतदारसंघात नणंद भावजय लढत बघायला मिळणार आहे.
रोहिणी खडसे हे लोकसभा निवडणूक लढणार नाही, असे एकनाथराव खडसे यांनी पत्रकार परिषद घेऊन जाहीर केले होते. तसेच, मला देखील डॉक्टरांच्या सल्ल्यानुसार उमेदवारी लढता येणार नाही असे त्यांनी जाहीर केले होते. रोहिणी खडसे या विधानसभेसाठी तयारी करत असल्याने त्या लोकसभा निवडणूक लढण्यास इच्छुक नाही, असं सांगितलं जात होतं. मात्र, आज अचानक रोहिणी खडसे यांनी शरद पवार यांची भेट घेतल्याने रावेर मतदार संघाचे समीकरण बदलणार असल्याचं दिसून येत आहे.
राष्ट्रवादी शरदचंद्र पवार या पक्षाकडून अनेकजण रावेर मतदारसंघात इच्छुक आहेत. यात माजी आमदार संतोष चौधरी यांनी तर मलाच उमेदवारी मिळाली असल्याचे जाहीर करत भुसावळ शहरातून कार्यकर्त्यांनी भव्य अशी मिरवणूक काढून वातावरण निर्मिती करण्यात आले. तर शरद पवार गटाचे जिल्हाध्यक्ष रवींद्र पाटील यांनी सुद्धा उमेदवारी मलाच मिळणार असल्याने मतदार संघात भेटीगाठी सुरू केल्या आहे. नेमकी उमेदवारी कोणाला मिळणार हे स्पष्ट नसले तरी अती उत्साही उमेदवारांनी उमेदवारी जाहीर करत मतदारसंघात भेटीगाठी सुरू केल्या आहेत. मात्र, ऐनवेळी शरद पवार रावेर मतदारसंघात भाजपाला तगडे आव्हान देण्यासाठी रोहिणी खडसे यांना उमेदवारी जाहीर करणार अशी देखील चर्चा सुरू आहे
आज रोहिणी खडसे यांनी शरद पवारांची भेट घेतल्याने अनेक तर्क वितर्क लढविले जात आहेत. रोहिणी खडसे यांना रावेर लोकसभेसाठी बोलवण्यात आल्याचे देखील चर्चा सुरू आहे. शरद पवार त्यांना लोकसभा निवडणूक लढवण्याचे आदेश देणार असल्याची चर्चाही सध्या सुरू आहे. जर रोहिणी खडसे या राष्ट्रवादी शरद पवार गटाकडून उमेदवार झाल्या तर रावेरमध्ये रक्षा खडसे विरुद्ध रोहिणी खडसे असा नणंद भावजय सामना रंगणार हे निश्चित आहे.