जळगाव लोकसभेचे विद्यमान खासदार उन्मेष पाटील यांचे तिकीट कापून भाजपने स्मिता वाघ यांना उमेदवारी जाहीर केली आहे. या पार्श्वभूमीवर काल भाजपतर्फे जळगाव व रावेर लोकसभा मतदारसंघातील पदाधिकारी व कार्यकर्त्यांची बैठक पार पडली. यात उन्मेष पाटील यांची अनुपस्थिती जाणवल्याने चर्चेला उधाण आले आहे. मात्र भाजपतर्फे बैठकीचा निरोप न मिळाल्याचे उन्मेष पाटील यांनी सांगितले.
जळगाव लोकसभा मतदारसंघात स्मिता वाघ यांना भाजपने उमेदवारी जाहीर केल्याने नाराज असलेले उन्मेष पाटील हे सध्या महाविकास आघाडीच्या संपर्कात असल्याची चर्चा आहे.
याबाबत मंत्री गिरीश महाजन यांना विचारणा केली असता त्यांनी सांगितले की उन्मेष पाटील हे बाहेरगावी असल्याने त्यांचा मोबाईल बंद आहे. मी स्वतः त्यांना संपर्क करण्याचा प्रयत्न केला, मात्र त्यांचा फोन लागू शकला नाही. शेवटी त्यांचे पीए यांना फोन करून बैठकीबाबत सूचना देण्यात आल्या
उन्मेष पाटील यांनी सांगितले की मला कुठलाही बैठकीचा कॉल किंवा एसएमएस आलेला नाही. मी मतदार संघामध्ये लग्न समारंभाच्या कार्यक्रमात होतो. त्यामुळे मला कॉल आला नसल्यामुळे मी या बैठकीला येऊ शकलो नाही हे त्यांनी स्पष्टीकरण दिले.
उन्मेष पाटील यांना भाजप पक्षातर्फे डावलण्यात येत असल्याच्या चर्चा सुरू आहेत. दोन दिवसांपूर्वी मुंबई येथील मातोश्रीवर त्यांनी उद्धव ठाकरे यांची भेट घेतल्याचे विश्वसनीय सूत्रांकडून माहिती मिळाली आहे. याबाबत खुद्द उन्मेष पाटील यांना विचारणा केली असता त्यांनी या संदर्भात कुठलीही भेट झाली नसल्याचे सांगितले. माझी भूमिका स्पष्ट आहे. मी भाजपसोबत आहे. याबाबत मी लवकरच पत्रकार परिषद घेऊन माझी भूमिका जाहीर करेन, असेही ते म्हणाले.
Read Latest Maharashtra News Updates And Marathi News
मंत्री गिरीश महाजन यांना उन्मेष पाटील हे ठाकरे गटाच्या संपर्कात असल्याबद्दल विचारणा केली असता, मला याबाबत कुठलीही माहिती नाही, मी माहिती घेऊन सांगतो, असे ते म्हणाले.