सातारा: लोकसभेच्या जागेवरून राज्यभर महायुतीतील भाजप-शिवसेना-राष्ट्रवादी या प्रमुख पक्षांसह घटक पक्षांमध्ये जोरदार रस्सीखेच सुरू आहे. यामध्ये सातारा लोकसभा मतदारसंघाचाही समावेश असून अजित पवार यांची राष्ट्रवादी काँग्रेस या मतदारसंघावर दावा करत आहे, तर भाजप उदयनराजेंसाठी आग्रही असल्याचे समजते. दरम्यान, वाटाघाटी सुरू असतानाच खासदार उदयनराजे भोसले यांच्या उमेदवारीला प्रत्यक्ष-अप्रत्यक्ष विरोध करणारे आणि लोकसभेसाठी इच्छुक असणारे शिवसेना शिंदे गटाचे पुरुषोत्तम जाधव आणि अण्णासाहेब पाटील आर्थिक विकास महामंडळाचे अध्यक्ष माथाडी नेते नरेंद्र पाटील यांनी नुकतीच भेट घेतल्याने खळबळ उडाली होती.
त्यानंतर सोमवारी भाजपचे संकटमोचक, ग्रामविकासमंत्री गिरीश महाजन यांनी अचानक सातारा येथे जलमंदिर पॅलेस या निवासस्थानी उदयनराजे यांची भेट घेऊन चर्चा केली. तद्नंतर काही मिनिटातच उदयनराजे यांचे छोटे बंधू आमदार शिवेंद्रराजे यांच्याशीही “सुरुची” वाड्यावर भेट घेऊन बंद दाराआड चर्चा केली. या राजकीय घडामोडी गेल्या चार-पाच दिवसांपासून एकापाठोपाठ एक घडत असल्यामुळे राजकीय वर्तुळात खळबळ उडाली असून सुरुची वाडा लोकसभा निवडणुकीसाठीचे चर्चेचं केंद्रस्थान बनले आहे.
सातारा लोकसभा मतदारसंघात सहा मतदारसंघांपैकी सातारा-जावळीचे आमदार श्रीमंत छत्रपती शिवेंद्रराजे भोसले हे भाजपचे एकमेव आमदार आहेत. आ. शिवेंद्रराजे यांची राजकीय कारकीर्द उठावदार आहेच. शिवाय त्यांचा जिल्ह्यात राजकारणात स्वतंत्र दबदबा कायम आहे. उदयनराजे वगळता जिल्ह्यातील मित्र पक्षांच्या नेत्यांबरोबर त्यांचे मित्रत्वाचे संबंध आहेतच. शिवाय मुख्यमंत्री एकनाथ शिंदे हे सातारा जिल्ह्याचे असल्याने शिवसेनेसोबतही त्यांची चांगली सलगी वाढली आहे. एकूणच त्यांची सर्वपक्षीय नेत्यांसोबत सलगी असली तरी मोठे बंधू खासदार उदयनराजे भोसले यांच्याबरोबर मात्र त्यांचे पटत नसल्याने त्यांना त्यांचा विरोध आहे असे म्हणावे लागेल.
असे असताना खासदार उदयनराजे ही लोकसभा निवडणूक लढविण्यासाठी इच्छुक असल्याने आमदार शिवेंद्रराजे भोसले उदयनराजेंसाठी शब्द टाकतील का याबाबत साशंकता आहे. त्यातच महायुतीकडून अद्याप कुणालाही उमेदवारी जाहीर न केल्याने तळ्यातमळ्यात अशी इच्छुकांची अवस्था झाली आहे. अशातच इच्छुक उमेदवार असलेले शिवसेनेचे पुरुषोत्तम जाधव, भाजपचे नरेंद्र पाटील यांनी शिवेंद्रराजे यांची भेट घेतल्याच्या पार्श्वभूमीवर आमदार शिवेंद्रराजे लोकसभेसाठी नेमकी काय भूमिका घेणार? तसेच लोकसभेच्या उमेदवारीसाठी कोणाला पाठबळ देणार? असे प्रश्न मतदारांना लागून राहिले आहेत.
सातारा लोकसभा मतदारसंघात महायुतीमध्ये उमेदवारीचा पेच निर्माण झाला असताना खासदार उदयनराजे भोसले यांना उमेदवारी जाहीर होत नसल्याने कार्यकर्ते नाराज झाले आहेत. ठीकठिकाणी कार्यकर्त्यांकडून विरोध होताना दिसत आहे. दुसरीकडे मात्र गेल्या चार दिवसात खासदार उदयनराजे यांच्या उमेदवारीला विरोध करत लोकसभेसाठी इच्छुक असणारे पुरुषोत्तम जाधव व माथाडी नेते नरेंद्र पाटील यांनी आमदार शिवेंद्रराजे भोसले यांची निवासस्थानी भेट घेऊन बंद कमरा चर्चा केली. त्यामुळे “सुरुची”वाडा आता लोकसभा निवडणुकीतील चर्चेच्या केंद्रस्थानी आला आहे.
आ. शिवेंद्रराजे यांचे महायुतीतील सर्वच नेत्यांबरोबर असणारे निकटचे संबंध आणि जिल्ह्यावर असलेली मजबूत पकड असल्यामुळे आ. शिवेंद्रराजे यांची भूमिका लोकसभा निवडणुकीत तेवढीच महत्त्वाची असणार आहे. याच पार्श्वभूमीवर इच्छुक उमेदवारांची भाऊगर्दी सुरुची वाड्यावर होऊ लागली आहे. भेटीनंतर शिवेंद्रराजे भोसले यांच्याबरोबर झालेली भेट खाजगी असल्याचे पुरुषोत्तम जाधव व नरेंद्र पाटील सांगत असले तरी भेटीनंतर दोन्हीही इच्छुक उमेदवारांनी सातारा लोकसभेसाठी महायुतीकडून उमेदवारी मिळाली पाहिजे, अशी आग्रही भूमिका घेतली आहे.
खासदार उदयनराजे यांच्या उमेदवारीला विरोध करणाऱ्या इच्छुक उमेदवारांच्या भेटीबाबत शिवेंद्रराजे यांनी कोणतीही वाच्यता केलेली नाही. त्यामुळे आमदार शिवेंद्रसिंहराजे लोकसभेच्या अनुषंगाने नेमकी काय भूमिका घेणार हे पाहणे महत्वाचे ठरणार आहे. दरम्यान, सातारचे दोन्ही राजे एकाच पक्षात असले तरी सातारा नगरपालिकेतील राजकारण सर्वांना ज्ञात आहे. नगरपालिकेच्या राजकारणात छत्रपती उदयनराजे व छत्रपती शिवेंद्रराजे हे दोन्ही बंधू लोकसभेच्या अनुषंगाने एकत्र येतील का? अशी चर्चा सातारकारांमध्ये सुरू झाली आहे. त्याच पार्श्वभूमीवर खासदार उदयनराजे भोसले हे आमदार शिवेंद्रसिंहराजे यांची भेट घेऊन लोकसभेच्या उमेदवारीवरून एकमेकांशी चर्चा करतील का? असा प्रश्न या मतदारसंघात उपस्थित होऊ लागला आहे.