पुणे : पुण्यातून भारतीय जनता पक्षाकडून उमेदवारी मिळविण्यासाठी उपमुख्यमंत्री देवेंद्र फडणवीसांच्या समर्थकांमध्ये जुंपली असतानाच त्यातील एका समर्थकाने थेट राष्ट्रीय सरचिटणीस विनोद तावडे यांना साकडे घातले आहे. त्यामुळे पुण्याच्या उमेदवारीवरून फडणवीस विरुद्ध तावडे असा सुप्त संघर्ष दिल्लीत पाहायला मिळण्याची शक्यता वर्तविण्यात येत आहे.

पुण्यातून उमेदवारी मिळवण्यासाठी भाजपमध्ये जोरदार रस्सीखेच असून, प्रमुख दोन इच्छुकांमधील शीतयुद्ध हा चर्चेचा विषय ठरला आहे. जानेवारी महिन्यात या इच्छुकांच्या ‘अपने आपने राम’ ते ‘रामकथा सत्संगा’ने अवघी पुण्यनगरी न्हाऊन निघाली होती. उत्तरेतील या प्रवचनकारांचा उपयोग उमेदवारी मिळविण्यासाठी कसा केला जाऊ शकतो, याचे आडाखेही गेली दोन दिवस दिल्लीत पाहावयास मिळत असल्याची चर्चा आहे. यातीलच एका प्रवचनकाराच्या माध्यमातून राष्ट्रीय सरचिटणीस तावडे यांना साकडे घालण्यात आल्याचे समजते.
केसाने गळा कापू नका…रामदास कदम यांच्या तोंडून शिंदेंची खदखद? विश्वासू नेत्याकरवी भावना वदवल्याची चर्चा
राष्ट्रीय सरचिटणीस असलेले तावडे यांचा पुण्यातील संघटनेवर पूर्वी प्रभाव होता. फडणवीस यांनी राज्याच्या राजकारणातील आपली पकड अधिक घट्ट केल्यानंतर तावडे यांचा प्रभाव काहीसा कमी झाला होता. मात्र, त्यांनी दिल्लीत आपला जम बसविल्यानंतर पुन्हा एकदा शहरातील काही नेत्यांनी त्यांच्याशी गाठीभेटी सुरू केल्याची चर्चा आहे. पुण्यातील उमेदवारी मिळविण्यासाठी एका नेत्याने त्यांना साकडे घातले असून, गेले दोन दिवस हा नेता दिल्लीत तळ ठोकून असल्याची मतदारसंघात चर्चा आहे.

‘युती’चे भिजत घोंगडे

महायुतीमध्ये कोण किती जागा लढणार हे स्पष्ट झाल्यानंतर भाजपकडून उमेदवारी जाहीर केली जाईल, अशी अपेक्षा आहे. पुण्यातील उमेदवाराचा निर्णयही त्या वेळी जाहीर केला जाईल, असे अपेक्षित आहे. तोपर्यंत स्थानिक नेत्यांमधील उमेदवारी मिळवण्याचा संघर्ष अधिक टोकदार होण्याची शक्यता आहे. त्याची झलक दोन दिवसांपूर्वी विरोधातील ‘फ्लेक्स’ लावण्यावरून शहरवासीयांना दिसला आहे.
कमळावर लढणाराच जिंकेल, दक्षिण मुंबईवरुन शिवसेना-भाजपात रस्सीखेच? शिंदेंची धाकधूक वाढली

फडणवीस की तावडे?

पुण्यातील उमेदवारी मिळवण्यासाठी स्थानिक नेत्यांनी सर्वोतपरी प्रयत्न सुरू असताना राज्यातील अत्यंत महत्त्वाकांक्षी समजल्या जाणाऱ्या दोन्ही नेत्यांना साकडे घातले आहे. या नेत्यांकडून कोणत्या उमेदवाराच्या पारड्यात आपले ‘वजन’ टाकले जाईल आणि केंद्रीय नेतृत्वाकडून हिरवा कंदील मिळवला जाईल, त्याला उमेदवारी मिळेल, अशी चर्चा आहे. ही उमेदवारी जाहीर होईपर्यंत या नेत्यांकडून मतदारांचे, नागरिकांचे जोरदार मनोरंजन सुरू राहील, असे चित्र दिसत आहे.
Read Latest Maharashtra News Updates And Marathi News

स्क्रिनिंग कमिटीनंतर चर्चा

भारतीय जनता पक्षाची दिल्लीतील स्क्रिनिंग कमिटीची बैठक झाल्यानंतर पश्चिम महाराष्ट्रातील उमेदवारी निश्चिती करण्याबाबत उच्च व तंत्र शिक्षणमंत्री चंद्रकांत पाटील यांच्या शब्दला वजन आले आहे. त्यांच्याकडे सध्या सोलापूरच्या पालकमंत्रिपदाची जबाबदारी आहे. ते पुण्यातून विधानसभेवर निवडून गेले असून, मुळचे कोल्हापूरचे आहे. त्यामुळे कोल्हापूर, सांगली, सातारा, सोलापूर आणि पुणे या ठिकाणच्या भाजपच्या पाच जागांवर कोण उमेदवार असावेत, याबाबत पाटील यांनी अहवाल सादर केल्याचे समजते. दरम्यान, पाटील यांनी स्क्रिनिंग कमिटीच्या बैठकीनंतर पुण्यातून इच्छुक असलेल्या उमेदवारांना गेली दोन दिवस बोलावून घेऊन त्यांना समजुतीच्या चार गोष्टी सांगितल्याची चर्चा आहे.