ठाणे: भाजप आमदार गणपत गायकवाड यांनी केलेल्या गोळीबारात जखमी झालेले महेश गायकवाड यांना रुग्णालयातून सोडण्यात आले आहे. मागील काही दिवसांपासून त्यांच्यावर रुग्णालयात उपचार सुरू होते. अखेर महेश गायकवाड यांना डिस्चार्ज मिळाले आहे. या गोळीबार प्रकरणावर महेश गायकवाड यांच्या पत्नी सारिका गायकवाड यांनी प्रतिक्रिया दिली आहे. त्यांनी खूप चुकीचे केले आहे. पुन्हा असे कोणासोबत घडू नये यासाठी त्यांच्यावर कारवाई केली पाहिजे अशी मागणी सारिका गायकवाड यांनी केली आहे.जमिनीच्या वादातून भाजप आमदार गणपत गायकवाड यांनी उल्हासनगर हिल लाईन पोलीस ठाण्यातच शिवसेनेचे कल्याण शहरप्रमुख महेश गायकवाड आणि सहकारी राहुल पाटील यांच्यावर गोळीबार केला होता. या हल्ल्यात गंभीर जखमी झालेले महेश गायकवाड यांच्यावर उपचार सुरू होते मात्र आज त्यांना रुग्णालयातून सोडण्यात आले आहे.

कट्टर विरोधक श्रीकांत शिंदे आणि राजू पाटील एकाच व्यासपीठावर, मनसे-शिंदेसेनेचं मनोमिलन झालं?

आमदार गणपत गायकवाड न्यायालयीन कोठडीत

गोळीबार प्रकरणात आमदार गणपत गायकवाड सध्या न्यायालयीन कोठडीत आहेत. गणपत गायकवाड यांच्यासह १५ जणांना १४ दिवसांची न्यायालयीन कोठडी देण्यात आली असून सध्या सर्व आरोपी तळोजा कारागृहात आहेत. सत्ताधारी आमदारानेच पोलीस ठाण्यात गोळीबार केल्याने एकच खळबळ उडाली होती. यानंतर मुख्यमंत्री एकनाथ शिंदे तसेच खासदार श्रीकांत शिंदे यांनी महेश गायकवाड यांची रुग्णालयात जात विचारपूस केली होती

महेश गायकवाड यांच्या स्वागतासाठी समर्थकांची बॅनरबाजी

गणपत गायकवाड यांनी केलेल्या गोळाबारात गंभीर जखमी झालेल्या महेश गायकवाड यांच्यावर मागील अनेक दिवसांपासून उपचार सुरू होते. आमदार गणपत गायकवाड यांनी तब्बल सहा गोळ्या महेश गायकवाड यांच्यावर झाडल्या होत्या. ठाण्यातील ज्युपिटर हॉस्पिटलमध्ये महेश गायकवाड यांच्यावर उपचार चालू होते. यादरम्यान भाजप आणि शिवसेनेच्या कार्यकर्त्यांमध्ये सोशल मिडिया वॉर रंगले होते. दोन्ही नेत्यांच्या समर्थकांकडून स्टेटस ठेवत एकमेकांना डिवचण्याचा प्रयत्न करण्यात येत होता. मात्र, महेश गायकवाड यांना डिस्चार्ज मिळाल्याने कार्यकर्त्यांनी शहरभर बॅनर लावले असून स्वागताची जोरदार तयारी केली आहे