बारामती : राष्ट्रवादी काँग्रेसमधील फूटीनंतर पक्ष व चिन्ह अजित पवार गटाकडे गेल्यानंतर शरद पवार गटाला कमालीचा धक्का बसला आहे. विद्यमान खासदार सुप्रिया सुळे यांचा बारामती लोकसभा मतदारसंघातील विजय रथ रोखण्यासाठी उपमुख्यमंत्री अजित पवार यांनी कंबर कसली आहे. सत्तेत असलेल्या अजित पवार यांना शह देण्यासाठी आता खुद्द शरद पवार हे जातीने लक्ष घालू लागले असून रविवारी त्यांनी पदाधिकाऱ्यांची बैठक बोलावली आहे.
बारामतीच्या विद्यमान खासदार सुप्रिया सुळे गेली तीन टर्म या मतदारसंघाचे प्रतिनिधित्व करतात. २००९ साली त्या भाजपच्या कांता नलावडे यांच्या विरोधात सहज विजयी झाल्या. २०१४ साली देशभरात मोदी लाट असताना आणि भाजपने राष्ट्रीय समाज पक्षाचे अध्यक्ष महादेव जानकर यांच्या मागे ताकद उभी केली असतानाही सुळे यांनी बालेकिल्ला राखला. लोकसभा २०१९ ला पुन्हा मोदींचा देशभर करिश्मा असताना आणि खुद्द अमित शहा यांनी बारामतीत सभा घेतल्यानंतरही सुळे या सुमारे दीड लाखांहून अधिक मतांनी विजयी झाल्या. त्यात अजित पवार यांनी आखलेली रणनीती महत्त्वाची होती.
अन्य तालुक्यात मताधिक्याबाबत साशंकता आल्यानंतर अजित पवार यांनी बारामतीत कमालीची ताकद लावली. परिणामी एकट्या बारामतीत त्यांना १ लाख २८ हजारांचे मताधिक्य मिळाले. इंदापूरसह भोर-वेल्ह्याने साथ दिल्याने त्या विजयी झाल्या. आता राष्ट्रवादीतील फुटीनंतर सर्व समीकरणे बदलली आहेत. खुद्द अजित पवार हे भगिनी सुप्रिया यांच्या पराभवासाठी रणनीती आखत आहेत. त्यासाठी ते पत्नी सुनेत्रा यांनाच निवडणूक रिंगणात उतरवणार हे आता स्पष्ट झाले आहे.
भेटीगाठीचा सिलसिला कायम, प्रचाराने वेग घेतला, दादांच्या राष्ट्रवादीकडून बारामतीत सुनेत्रा पवार फिक्स
अजित पवार यांचा बारामतीत वरचष्मा आहे. मतदारसंघातील ६ पैकी ४ ठिकाणी महायुतीचे आमदार आहेत. दोन ठिकाणी काँग्रेसचे आमदार आहेत. मतदारसंघातील इंदापूरमध्ये आमदार दत्तात्रय भरणे व भाजपचे हर्षवर्धन पाटील यांची त्यांना साथ आहे. दौंडमध्ये कुल-थोरात यांची साथ मिळणार आहे. पुरंदरमध्ये काँग्रेसचे संजय जगताप तर भोर-वेल्ह्यात संग्राम थोपटे आमदार आहेत. खडकवासल्यात भाजपचे भीमराव थोरात आमदार आहेत. त्यामुळे महायुतीसाठी पोषक वातावरण मतदारसंघात आहे.
सुनेत्रा वहिनीच बारामती लोकसभेच्या उमेदवार, भाजप नेते संजय काकडेंनी ‘ओपन सिक्रेट’ फोडलंच
कन्या सुप्रिया यांना या मतदारसंघातून विजयी करायचे झाल्यास शरद पवार यांना मोठे कष्ट घ्यावे लागतील. त्यासाठी ते आता मैदानात उतरले आहेत. स्वतंत्रपणे फोन करून निवडक पदाधिकाऱ्यांशी ते चर्चा करत आहेत. रविवारी त्यांनी बैठक बोलावली आहे. दुसरीकडे अजित पवार, सुनेत्रा पवार यांनी मेळावे व गाठीभेटींचा जोर वाढवला आहे. प्रत्येक तालुक्यात संघटन मजबूत करण्याकडे त्यांचा कल आहे. त्यामुळे आगामी काळात बारामतीची लढत अधिक रंगतदार होईल अशी चिन्हे आहेत.