म.टा. प्रतिनिधी, नागपूर : तिरंगा चौकातील चांदनी बारमध्ये बाबू बाटला व त्याच्या साथीदारांनी दोघांना शिवीगाळ करून मारहाण केली. या प्रकरणी कोतवाली पोलिसांनी बाबू बाटला व त्याच्या साथीदारांविरुद्ध शिवीगाळ करून मारहाण केल्याचा गुन्हा दाखल केला.मोहन पटले व त्याचा साथीदार अशी गुन्हा दाखल करण्यात आलेल्यांची नावे आहेत. स्वप्नील विलासराव आंबटकर (वय २३, रा. सुदामपुरी) व त्याचा मित्र विनय संजय ईनकाने (वय २२) अशी जखमींची नावे आहेत. स्वप्नील हा फळभाजी विक्रीचा व्यवसाय करतो.
तक्रार ऐकून न घेतल्याने तरुणाने पोलीस आयुक्तांची गाडी फोडली, घटनेत गाडीचं मोठं नुकसान
पोलिसांनी दिलेल्या माहितीनुसार, बुधवारी मध्यरात्री १२ वाजताच्या सुमारास स्वप्नील, विनय व प्रज्वल नंदकिशोर बालेश्वर (वय २१) हे तिघे चांदनी बारमध्ये जेवण करायला गेले. तिघेही टेबलवर बसले. बाजूलाच बाबू बाटला व त्याचे साथीदार बसले होते. रात्री १२.३० वाजताच्या सुमारास बाबू बाटला हा स्वप्नीलच्या टेबलजवळ आला. विनय याला शिवीगाळ करायला लागला. स्वप्नीलने त्याला हटकले. बाटलाने स्वप्नीललाही शिवीगाळ केली. स्वप्नीलने बाटलाच्या गालावर थापड मारली. बारमधील कर्मचाऱ्यांनी वाद सोडवून बाटला व त्याच्या साथीदारांना बाहेर काढले. जेवण केल्यानंतर स्वप्नील व त्याचे मित्र बारमधून बाहेर निघाले. बाबू बाटला व त्याचे साथीदार स्वप्नीलजवळ आले. शिवीगाळ करून चाकूचा धाक दाखवून ठार मारण्याची धमकी दिली. दोघांना मारहाण केली. स्वप्नीलने कोतवाली पोलिसांत तक्रार दिली. पोलिसांनी गुन्हा दाखल करून तपास सुरू केला आहे.