म. टा. विशेष प्रतिनिधी, नाशिक : सध्या लोकसभेचे वारे वाहत असताना, नाशिकमध्ये मात्र लोकसभेऐवजी विधानसभेसाठी फिल्डिंग लावण्यात नेतेमंडळी व्यस्त आहे. शिर्डी लोकसभा मतदारसंघातील उमेदवारीवरून नाराज झालेले माजी मंत्री बबनराव घोलप यांनी मुख्यमंत्री एकनाथ शिंदे यांच्या गाठीभेटी वाढवल्याने ठाकरे गटाचे टेन्शन वाढले आहे. दुसरीकडे माजी मुख्यमंत्री तथा काँग्रेस नेते अशोक चव्हाण यांच्या भाजप प्रवेशामुळे इगतपुरीचे काँग्रेसचे आमदार हिरामण खोसकर यांच्याबाबत ‘सस्पेन्स’ व्यक्त केला जात असला तरी खोसकरांनी पक्ष बदलण्याचा दावा खोडून काढला आहे. त्यातच नाशिक पूर्वमध्ये भाजपकडून उमेदवारी मिळण्याची शक्यता संपुष्टात आल्याने माजी आमदार बाळासाहेब सानप यांनीही ‘मातोश्री’शी जवळीक वाढवल्याने जिल्ह्यातील राजकारण तापले आहे.
एप्रिलमध्ये लोकसभेच्या निवडणुका होणार असून, त्यासाठी मार्चमध्ये आचारसंहिता लागू होणार आहे, तर विधानसभेच्या निवडणुका ऑक्टोबर महिन्यात होणार आहेत. त्यामुळे सध्या लोकसभा निवडणुकीसाठी इच्छुकांकडून प्रयत्न सुरू आहेत. नाशिक लोकसभेच्या जागेवरून भाजप आणि शिवसेना शिंदे गटासह महाविकास आघाडीतही चढाओढ सुरू आहे. या राजकीय चढाओढीत काही राजकारण्यांकडून विधानसभेसाठी फिल्डिंग लावली जात आहे. बदललेल्या राजकीय परिस्थितीत नाशिकमध्ये सध्या घोलप, सानप, खोसकर काय भूमिका घेतात, याकडे लक्ष लागून आहे. शिर्डी लोकसभेची उमेदवारी मिळणार नसल्यामुळे ठाकरे गटात असलेले माजी मंत्री घोलप यांनी नाराज होऊन ‘मातोश्री’पासून अंतर राखले आहे. घोलप यांनी ठाकरे गटाच्या बैठकींपासून अंतर राखत, शिंदे गटासोबतचे सख्य वाढविल्यामुळे ठाकरे गटाला ते ‘जय महाराष्ट्र’ करणार असल्याच्या चर्चा होत आहेत. मात्र, आपण एकदोन दिवसांत आपला निर्णय घेणार असल्याचे सांगत, शिंदे गटातील प्रवेशाबाबत घोलप यांनी सस्पेन्स कायम ठेवला आहे. दुसरीकडे केनिया दौऱ्यावरून परतलेले खोसकर यांनी आपण चव्हाण यांच्यासोबत जाणार नसल्याचे स्पष्ट केले आहे. मात्र, राष्ट्रवादीच्या अजित पवार गटासोबतचा त्यांचा घरोबा कायम असल्यामुळे विधानसभा निवडणूक खोसकर हे अजित पवार गटाकडून लढतील, अशा चर्चा झडत आहेत.
सानपांचेही ‘वेट अँड वॉच’
घोलप, खोसकरांसोबत नाशिक पूर्व विधानसभेचे माजी आमदार बाळासाहेब सानप यांचेही तळ्यातमळ्यात सुरू आहे. गेल्या वेळेस ऐनवेळी उमेदवारी कापण्यात आल्याने सानप यांनी राष्ट्रवादीकडून उमेदवारी केली होती. मात्र, अॅड. राहुल ढिकलेंनी त्यांचा पराभव केला. त्यानंतर सानप यांनी शिवसेना व्हाया भाजपमध्ये घरवापसी केली होती. आता ते विधानसभेसाठी पुन्हा सक्रिय झाले असून, त्यांनी गोदाआरतीच्या माध्यमातून संपर्क वाढवला आहे. मात्र, भाजपकडून उमेदवारी मिळण्याची शक्यता कमी असल्याने त्यांनी पुन्हा ‘मातोश्री’शी संपर्क वाढवल्याची चर्चा रंगते आहे. सानप यांनी ग्रामसभेत घेतलेल्या भूमिकेमुळे राहुल ढिकलेंसह नाशिक मध्यच्या आमदार देवयानी फरांदे यांच्या अडचणी वाढल्या आहेत.