असदुद्दीन ओवेसी हे आज छत्रपती संभाजीनगर शहरात आले होते. यावेळी त्यांनी माध्यमांशी संवाद साधला. यावेळी बोलताना ते म्हणाले की, ‘विरोधी पक्षाच्या नेत्यांनी भाजपविरोधात बैठक बोलावली होती. मात्र त्यांनी मला का बोलावलं नाही, याचे उत्तर तुम्ही त्यांनाच विचारा. पंतप्रधान अमेरिकेत गेले आहेत. अमेरिका आणि भारताचे संबंध चांगले व्हावेत, असं आम्हालाही वाटतं. विद्यार्थ्यांचे व्हिजाचे प्रश्न आहेत, ते सुटले पाहिजेत. अमेरिकेच्या माजी राष्ट्रपतींनी सांगितलं की, भारतामध्ये अल्पसंख्याक समुदायाला टार्गेट केलं जात आहे. यामुळे भारताचं नुकसान होईल.’
‘पंकजा मुंडे बीआरएस पक्षात आल्या तर त्या मुख्यमंत्रिपदाच्या उमेदवार असतील’
भारतीय जनता पक्षाचे नेते गोपीनाथ मुंडे यांनी महाराष्ट्रात भाजप वाढवला. त्यांची मुलगी पंकजा मुंडे यांचं महाराष्ट्रात मोठं वलय आहे. मात्र, गेल्या दोन वर्षांपासून भारतीय जनता पक्षामध्ये त्यांना डावलण्याचे काम केलं जात आहे. यामुळे भारत राष्ट्र समितीमध्ये अनेक मोठे नेते येत आहे. पंकजा यांनीही पक्षात प्रवेश केला तर के. चंद्रशेखर राव त्यांना न्याय देतील. कोअर कमिटीमध्ये चर्चा झाली आहे. यामुळे आम्ही पंकजा मुंडे यांना भेटायला जाणार आहोत. त्यावेळी त्यांना याबाबत प्रस्ताव देणार आहे. पंकजा मुंडे आमच्या पक्षात आल्या तर त्या मुख्यमंत्रिपदाच्या उमेदवार असतील,’ असा दावा बीआरएस पक्षाचे समन्वयक बाळासाहेब सानप यांनी केला आहे.