माणुसकीतून दिली लिफ्ट, पण मोबाईल हिसकावून पळाली

या प्रकरणी मिळालेल्या माहितीनुसार, राहुल विद्याधर पंडित (रा. एन-२, सिडको) असे फिर्यादीचे नाव आहे. राहुल हे ८ मार्च रोजी पहाटे ३ वाजेच्या सुमारास जयभवानी नगर चौकात कारमध्ये मित्राची वाट पाहत थांबले होते. यावेळी एक महिला ५ वर्षांच्या मुलीसह त्यांच्याकडे आली आणि तिने सिडको बसस्थानकापर्यंत सोडण्याची विनंती केली. राहुल यांनी माणुसकीच्या नात्याने तिला कारमध्ये बसवून घेतले. मात्र, काही अंतर गेल्यानंतर त्या महिलेने राहुल यांच्या हातातील मोबाईल हिसकावला आणि कारमधून उतरून धूम ठोकली.

पाठलाग केला अन् सापळ्यात अडकले

राहुल आणि त्यांचा मित्र सचिन नरवडे यांनी तात्काळ त्या महिलेचा पाठलाग केला. सिडको चौकात ती महिला दिसल्यानंतर त्यांनी कार थांबवून तिला जाब विचारण्याचा प्रयत्न केला. मात्र, त्याच वेळी तिथे आधीच दबा धरून बसलेले रोहित म्हस्के, ऋषिकेश आणि त्यांचे इतर साथीदार आले.

Kolhapur Crime : रिक्षाचालकाला दगडाने ठेचून संपवलं; ओळख पटवणंही कठीण झालेलं, 24 तासांत कोल्हापुरात दुसरी भयानक घटना

“महिलेला शिवीगाळ का करता?” असा बनाव रचत या टोळीने राहुल आणि त्यांच्या मित्रांना बेदम मारहाण केली. या झटापटीत आरोपींनी राहुल यांचा मित्र मदनजीत सिंग यांच्या कानातील दीड तोळ्याची सोन्याची बाळी जबरदस्तीने हिसकावून नेली.

पोलिसांत गुन्हा दाखल

या प्रकरणी राहुल पंडित यांनी पुंडलिकनगर पोलीस ठाण्यात तक्रार दिली आहे. पोलिसांनी रूपाली पाटील, रोहित म्हस्के, ऋषिकेश आणि एका अनोळखी व्यक्तीविरुद्ध गुन्हा दाखल केला आहे. पोलीस निरीक्षक अशोक भंडारे यांच्या मार्गदर्शनाखाली पोलीस उपनिरीक्षक म्हात्रे या प्रकरणाचा पुढील तपास करत आहेत.