नागपूर : कॅफेत प्रवेश करताना गुटखा आत नेण्यास मनाई केल्याने झालेला वाद, त्यानंतर सर्व्हिसवरून निर्माण झालेली नाराजी आणि ‘इगो हर्ट’ झाल्याने एका मास्टर शेफने चक्क कॅफेलाच आग लावल्याचा धक्कादायक प्रकार नागपुरातील शिवाजीनगर परिसरात समोर आला आहे. ‘द बॅरेल कॅफे’मध्ये पेट्रोल टाकून आग लावल्याने सुमारे ९ लाख रुपयांचे नुकसान झाले. या प्रकरणी अंबाझरी पोलिसांनी दोघांना ताब्यात घेतले असून सीसीटीव्ही फुटेज आणि तांत्रिक तपासाच्या आधारे या घटनेचा उलगडा करण्यात आला आहे.
पोलिसांनी दिलेल्या माहितीनुसार, ५ सप्टेंबरच्या रात्री मनमोहन उर्फ निखिल बुद्धसागर तिवारी (३१) हा द बॅरेल कॅफेमध्ये गेला होता. कॅफेत प्रवेश करताना त्याच्याकडे गुटखा होता. मात्र, कॅफेच्या नियमांनुसार गुटखा आत नेण्यास त्याला परवानगी देण्यात आली नाही. यावरून मनमोहन आणि कॅफेतील कर्मचाऱ्यांमध्ये वाद झाला. गुटखा बाहेर ठेवण्यास सांगितल्याने तो नाराज झाला. त्यानंतर एण्ट्रीसाठी त्याच्याकडून काही रक्कम जमा करून घेण्यात आल्याचेही सांगितले जात आहे.
या प्रकारामुळे आधीच नाराज असलेल्या मनमोहनचा राग त्यानंतर आणखी वाढला. त्याने कॅफेमध्ये दारू खरेदी केली होती. मात्र, ती दारू बनावट असल्याचा त्याचा आरोप होता. पैसे देऊनही अपेक्षित सर्व्हिस मिळाली नाही, असा त्याचा आरोप होता. गुटखा आत नेण्यास दिलेला नकार, एण्ट्रीच्या वेळी झालेला वाद आणि त्यानंतर सर्व्हिसबाबत झालेली नाराजी यामुळे त्याचा ‘इगो हर्ट’ झाला. याच रागातून त्याने कॅफेला धडा शिकवण्याचा निर्णय घेतल्याचे पोलिसांच्या प्राथमिक तपासात समोर आले आहे.
कॅफेतून बाहेर पडल्यानंतर मनमोहनने त्याचा साथीदार शुभम श्रीकृष्णकुमार विश्वकर्मा (२२) याला फोन केला. त्यानंतर शुभम ज्या हॉटेलमध्ये काम करीत होता, तेथून त्याला सोबत घेऊन दोघे पुन्हा द बॅरेल कॅफेजवळ पोहोचले. दोघेही तेथे आल्याचे तपासात निष्पन्न झाले आहे. त्यानंतर मनमोहनने आपल्या गाडीतून पेट्रोल काढले. कॅफेजवळ पोहोचल्यानंतर कथितरित्या पेट्रोलचा वापर करून त्याने कॅफेमध्ये आग लावली. आग लावल्यानंतर दोघेही घटनास्थळावरून पसार झाले.
आगीची माहिती मिळताच पोलिसांनी घटनास्थळी धाव घेत तपास सुरू केला. आग नेमकी कशामुळे लागली, याचा शोध घेताना पोलिसांनी कॅफेतील सीसीटीव्ही फुटेज तपासले. फुटेजमध्ये संशयित व्यक्ती कॅफेमध्ये प्रवेश करताना तसेच काही वेळाने आग लावल्यानंतर बाहेर पडताना दिसून आली. त्यानंतर तांत्रिक तपासाच्या आधारे पोलिसांनी मनमोहन आणि शुभम यांची ओळख पटवली आणि दोघांना ताब्यात घेतले.
मुख्य आरोपी मनमोहन उर्फ निखिल तिवारी हा पेशाने मास्टर शेफ आहे. त्याने यापूर्वी युरोपातील सुमारे १० ते १५ देशांमधील मोठ्या हॉटेलमध्ये शेफ म्हणून काम केल्याची माहिती पोलिसांना मिळाली आहे. सध्या तो नागपूरच्या खामला परिसरात स्वतःचे हॉटेल चालवत असल्याचे सांगितले जाते. तर दुसरा आरोपी शुभम विश्वकर्मा हा मूळचा भोपालचा असून नागपुरातील हॉटेल इंडस्ट्रीशी संबंधित आहे. तो नंदनवनमधील शास्त्रीनगर येथील हॉटेलमध्ये काम करीत असल्याची माहिती आहे. गुटखा आत नेण्यास दिलेल्या साध्या नकारातून सुरू झालेला वाद थेट कॅफे पेटवण्यापर्यंत पोहोचल्याने या घटनेची शहरात चर्चा असून अंबाझरी पोलिस पुढील तपास करत आहेत.