उत्तरेकडून येणाऱ्या थंड वाऱ्यांना अडथळा नसल्याने महाराष्ट्रात गेल्या आठवड्यापर्यंत कडाक्याची थंडी होती. पुण्यात किमान तापमानाचा पारा दहा अंशाच्या खालीच रेंगाळला होता. सोमवारपासून वातावरण बदलले असून, दिवसभर ढगाळ वातावरण आणि रात्रीचा गारठाही घटला आहे. मंगळवारी काही भागांत हलक्या सरी कोसळल्या. बुधवारीदेखील सकाळपासूनच ढगाळ वातावरण होते. दिवसभरात कमाल ३१.७ आणि किमान १६.३ अंश सेल्सिअस तापमानाची नोंद झाली. उपनगरातही सरासरीपेक्षा जास्त तापमान नोंदवले गेले. येत्या शनिवारपर्यंत तापमानातील वाढ कायम राहणार आहे.

BMC Election : बिनविरोध निवडणुकांबाबत हायकोर्टाचा सर्वात मोठा निर्णय, एकमेव उमेदवार उरला असेल तरीही…

सध्या पुण्यासह दक्षिण मध्य महाराष्ट्रावर मध्यम ते जास्त ढगांची उपस्थिती आहे. प्रतिचक्रवातीय वाऱ्याच्या स्थितीमुळे उत्तरेकडून वाहणारे वारे बंगालच्या उपसागरातून दक्षिण-मध्य महाराष्ट्रात पोहोचत आहेत, या मार्गातील हवेतील आर्द्रतेमुळे गारव्याचा जोर ओसरतो आहे. परिणामी तापमानात वाढ झाली आहे. बदललेल्या परिस्थितीमुळे येत्या शनिवारपर्यंत महाराष्ट्राच्या काही भागात ढगाळ हवामान आणि हलका पाऊस पडणार असल्याची शक्यता आयएमडीने व्यक्त केली आहे.

दिल्लीत थंडीची तीव्र लाट

दिल्लीमध्ये बुधवारी थंडीची तीव्र लाट होती. शहरातील किमान तापमान ३.८ अंश सेल्सिअसपर्यंत घसरले, अशी माहिती भारतीय हवामान विभागाने (आयएमडी) दिली. दिल्लीतील मुख्य वेधशाळा असलेल्या सफदरजंग येथे किमान तापमान ३.८ अंश सेल्सिअस नोंदले गेले. सरासरीपेक्षा ते ३.६ अंशांनी कमी आहे. पालम येथे ४.४ अंश (सरासरीपेक्षा २.९ अंश कमी) तर लोदी रोड येथे ३.६ अंश सेल्सिअस (सरासरीपेक्षा २.४ अंश कमी) तापमान नोंदले गेले. रिज परिसरात किमान तापमान ४.६ अंश सेल्सिअस (सरासरीपेक्षा ३.५ अंश कमी) तर आयानगर येथे ४ अंश सेल्सिअस (सरासरीपेक्षा ३.१ अंश कमी) नोंदले गेले. आयएमडीनुसार, किमान तापमान सरासरीपेक्षा ४.५ ते ६.४ अंशांनी कमी झाल्यास थंडीची लाट (कोल्ड वेव्ह) जाहीर केली जाते.