म. टा. प्रतिनिधी, मुंबई: मुंबईतील गणेशोत्सवात सर्वाधिक आकर्षणबिंदू म्हणजे लालबाग-परळचा परिसर. आजपासून सुरू होत असलेल्या गणेशोत्सवाच्या पार्श्वभूमीवर लालबाग-परळ, हिंदमाताचा परिसर सज्ज झाला आहे. सार्वजनिक गणेशोत्सव मंडळांच्या गणेशदर्शनासाठी आजपासून या भागांत गणेशभक्तांची वर्दळ वाढणार असल्याने मुंबई महापालिकेनेही विविध उपाययोजना केल्या आहेत.

‘गणपती बाप्पा मोरया’चा जयघोष करत आज, सोमवारपासून मुंबईत ठिकठिकाणी मोठ्या सार्वजनिक गणेशोत्सव मंडळांसह घरगुती गणरायांचे आगमन होईल. या पार्श्वभूमीवर लालबाग-परळ, हिंदमाता परिसरात उत्सवी वातावरण असल्याचे चित्र रविवारी होते. आज, सोमवारपासून गणेशभक्तांची पावले या भागांकडे वळणार असल्याने महापालिकेनेही सज्जता ठेवली आहे.

मोठ्या संख्येने येणाऱ्या गणेशभक्तांमुळे या परिसरात जागोजागी कचरा, अस्वच्छता पसरू नये, यासाठी एफ दक्षिण वॉर्डकडून सफाई कर्मचाऱ्यांची फौज सज्ज असणार आहे. शिवाय, स्वयंसेवी संस्थांचीही मदत घेण्यात येणार आहे. महापालिकेच्या ५० सफाई कामागारांच्या जोडीला स्वयंसेवी संस्थांचे ६० कर्मचारीही मदतीला असणार आहेत. या परिसरात अनेकदा या काळात पिण्याच्या पाण्याच्या प्लास्टिक बाटल्यांचा खच रस्त्यावर पडतो. या बाटल्या डब्यातच टाकण्यासाठी प्रथमच सात ठिकाणी बास्केट डबे बसवण्यात आले आहेत.

गणेशोत्सवात लालबाग, परळ भागांत लाखो भाविकांची गर्दी ओसंडून वाहत असते. लालबागचा राजा, गणेशगल्ली, चिंतामणी, तेजुकाया, परळचा राजा, रंगारी बदक चाळ आदी मंडळांच्या गणपतींचे दर्शन घेण्यासाठी मुंबईसह विविध भागांतून येणाऱ्या गणेशभक्तांची संख्या जास्त असते. दर्शनासाठी येणाऱ्या अतिमहत्त्वाच्या व्यक्तींचाही यात समावेश असतो. येथे येणाऱ्या भक्तांच्या गर्दीचे नियोजन आणि सुरक्षित दर्शनासाठी कार्यकर्त्यांची फौजही असते. त्यासोबतच आता महापालिकेनेही जय्यत तयारी केली आहे.

या भागात पुढील दहा दिवसांत मोठ्या प्रमाणात घनकचरा होतो. त्यामुळे प्रत्येक दिवशी स्वच्छता राहावी, यासाठी कचरा वाहून नेण्यावर अधिक भर घनकचरा व्यवस्थापन विभागाकडून दिला जातो. यंदा महापालिकेच्या एफ दक्षिण वॉर्डकडूनही सज्जता ठेवण्यात आली असून महापालिकेचे ५० सफाई कामगार, सहा मुकादम, स्वयंसेवी संस्थांचे ६० सफाई कामगार, कचरा वाहून नेणारे सहा मिनी कॉम्पेक्टर, चार मोठे कॉम्पेक्टर तयार ठेवण्यात आले आहेत. यंदा १२० लिटर क्षमतेचे मोठे ३० कचऱ्याचे डबेही ठिकठिकाणी बसवले आहेत. गेल्या वर्षी कमी क्षमतेचे डबे बसवण्यात आले होते. यावेळी प्रथमच एफ दक्षिण वॉर्डमध्ये प्लास्टिक बाटल्या गोळा केल्या जातील, असे बास्केट डबे बसवण्यात आल्याची माहिती एका वरिष्ठ अधिकाऱ्याने दिली.