ठाण्यात विविध पक्षांतील विद्यमान नगरसेवकांचा पत्ता पक्षाने कापला. काही माजी नगरसेवकांनी आपल्या कुटुंबातील सदस्यांना पालिकेच्या रणांगणात उतरवण्यासाठी एक पाऊल मागे घेतले आहे. घोडबंदर रोड प्रभाग क्रमांक १मधून शिवसेनेत (उबाठा) असलेले विद्यमान नगरसेवक नरेश मणेरा यांनी राजकीय संन्यास घेतला. या प्रभागात शिवसेनेच्या साधना जोशी यांच्याऐवजी भाजपमधून शिवसेनेमध्ये आलेल्या विक्रांत तांडेल यांना उमेदवारी देण्यात आली. घोडबंदर रोड येथून शिवसेनेने मधुकर पावशे, भूषण भोईर यांना पक्षाने नारळ दिला.

Kalyan Dombivli Elections: कल्याण-डोंबिवलीत महायुतीला मोठं खिंडार; भाजप आणि शिवसेनेच्या अनेक दिग्गजांनी मनसेचं इंजिन गाठलं

भोईर यांच्या पत्नी सपना भोईर यांना बाळकूम येथील प्रभाग क्रमांक ८ मधून उमेदवारी देण्यात आली. या प्रभागात संपूर्ण भोईर कुटुंबातील ४ सदस्यांना उमेदवारी देण्यात आली आहे. शिवसेनेच्या एकनाथ भोईर यांना उमेदवारी न देता यज्ञा भोईर यांना संधी दिली. तर आशा डोंगरे यांच्या जागी शीतल ढमाले यांनी उमेदवारी अर्ज दाखल केला. रुचिता मोरे यांच्या जागी त्यांचे पती राजेश मोरे यांनी अर्ज भरला. वागळे इस्टेट पट्ट्यात विद्यमान नगरसेविका मनिषा कांबळे, प्रभा बोरिटकर, माणिक पाटील यांना शिवसेनेने डावलले. काँग्रेसमधून शिवसेनेत आलेले मनोज शिंदे यांनीही उमेदवारी अर्ज दाखल केला.

‘राजा का बेटा राजा नहीं बनेगा, राजा वहीं बनेगा जो हकदार होगा’, पुर्वेश सरनाईक यांचा मोठा निर्णय

दिवा, कळव्यातही ‘नारळ’

कळव्यातून पूजा करसुळे, मंगल कळंबे यांची शिवसेनेतून तर राष्ट्रवादीतून शिवसेनेत गेलेल्या प्रमिला केणी यांना उमेदवारी नाकारण्यात आली. दिव्यात शिवसेनेचे अमर पाटील यांच्या जागी त्यांच्या पत्नीला संधी देण्यात आली. मात्र सुनिता मुंडे यांना शिवसेनेने उमेदवारी न देता या प्रभागात एकाच प्रभागातून रमाकांत मढवी आणि त्यांची कन्या साक्षी मढवी यांना उमेदवारी दिली.