मिळालेल्या माहितीनुसार, चेतन भुजबळ हे पत्नींसह इतर एका महिला उमेदवाराच्या उमेदवारी अर्ज भरण्यासाठी गेले होते. प्रवेशद्वारावर पोलिसांनी नियमांनुसार मर्यादित व्यक्तींनाच आत जाण्याची परवानगी दिली. यावेळी त्यांच्यासोबत अधिक व्यक्ती असल्याने पोलिसांनी अडवणूक केल्याचे सांगण्यात येते. यावरून चेतन भुजबळ आणि पोलिसांमध्ये वाद झाला.

हा वाद इतका वाढला की भुजबळ यांनी पोलिसांशी अरेरावी करत एकेरी भाषेचा वापर केल्याचा आरोप पोलिस सूत्रांनी केला आहे. खाकी वर्दीचा मान न राखता वरिष्ठ पोलिसांशीही हमरीतुमरी केल्याचे तेथील उपस्थित पोलिसांचे म्हणणे आहे. यासंदर्भातील एक व्हिडिओ सोशल मीडियावर मोठ्या प्रमाणात व्हायरल होत असून, त्यामध्ये भुजबळ यांचे आक्रमक वर्तन स्पष्टपणे दिसत असल्याचा दावा केला जात आहे.

Central Railway schedule update: रेल्वे प्रवाशांनो लक्ष द्या! 1 जानेवारीपासून मुंबई-पुणे गाड्यांच्या वेळा बदलणार; ‘वंदे भारत’सह अनेक गाड्यांच्या वेळापत्रकात मोठे फेरबदल

या घटनेनंतर, “निवडणूक होण्याआधीच जर उमेदवार किंवा पदाधिकारी अशा पद्धतीने पोलिसांशी वागत असतील, तर सर्वसामान्य नागरिकांच्या बाबतीत काय होणार?” असा सवाल उपस्थित केला जात आहे.

दरम्यान, या प्रकरणावर स्पष्टीकरण देताना चेतन भुजबळ यांनी आरोप फेटाळले आहेत. “मी माझ्या पत्नीचा उमेदवारी अर्ज भरण्यासाठी गेलो होतो. आमच्यासोबत इतर एक महिला उमेदवार आणि त्यांचे पती होते. पोलिसांनी केवळ तीन व्यक्तींनाच आत जाण्याची परवानगी दिली. माझ्या नावाने काही जण आत गेल्याचे पोलिसांनी सांगितले. त्यावर मी, ‘माझ्या नावाने कुणीही आत जाणे हे तुमचे काम आहे,’ असे म्हटले. यावरून पोलिसांनीच माझा एकेरी उल्लेख केला. त्यानंतर मी आत जाऊन अर्ज भरला आणि निघून आलो,” असे भुजबळ यांनी स्पष्ट केले.

या घटनेमुळे निवडणूक प्रचाराच्या पार्श्वभूमीवर राजकीय वातावरण आणखी तापण्याची चिन्हे दिसत आहेत.