विधान परिषदेच्या माजी उपसभापती डॉ. नीलम गोऱ्हे यांची विधान परिषद सदस्यत्वाची मुदत १३ मे २०२५ रोजी संपली. त्यामुळे सध्या रिक्त असलेले उपसभापती पद हे पावसाळी अधिवेशनात भरले जाणार आहे . विधान परिषदेच्या उपसभापतिपदावर शिवसेनेचा दावा आहे. विधान परिषद सभापती, विधानसभा अध्यक्ष ही दोन्ही पदे भाजपकडे आहेत. तर विधानसभेचे उपाध्यक्ष पद राष्ट्रवादी काँग्रेस अजित पवार पक्षाकडे आहे. त्यामुळे विधान परिषदेचे उपसभापती पद शिवसेनेकडे जाण्याचे निश्चित असून या पदासाठी डॉ. नीलम गोऱ्हे यांचे नाव आघाडीवर आहे.

Aaditya Thackeray : ‘जे आमच्यासोबत असतात त्यांच्यावर आम्ही अंधविश्वास ठेवतो’, आदित्य ठाकरेंचं वक्तव्य
दरम्यान, पावसाळी अधिवेशनाच्या पार्श्वभूमीवर सोमवारी विधानभवनात संसदीय कामकाज सल्लागार समितीची बैठक झाली. या बैठकीत अधिवेशनाचे कामकाज १० जुलैपर्यंत चालवण्याचा निर्णय घेण्यात आला.

अधिवेशनाच्या पहिल्याच दिवशी सन २०२६-२७ या वर्षाच्या पुरवणी मागण्या सादर केल्या जातील. या मागण्यांवर चर्चा होऊन त्या पहिल्या आठवड्यात मंजूर करण्यात येतील. विधानभवन येथे आयोजित कामकाज सल्लागार समितीच्या बैठकीला विधान परिषदेचे सभापती प्रा. राम शिंदे, विधानसभा अध्यक्ष ॲड. राहुल नार्वेकर, मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री सुनेत्रा पवार, विधानसभा उपाध्यक्ष अण्णा बनसोडे, संसदीय कार्यमंत्री चंद्रकांत पाटील उपस्थित होते.

Uddhav Thackeray : ठाकरेंच्या ‘मातोश्री’वरील बैठकीला 9 पैकी चारच खासदार प्रत्यक्ष हजर; कुणाचं धोंडे जेवणाचं कारण, कुणाच्या मुलाच्या प्रकृतीची सबब
विरोधी पक्षनेत्याविना सातवे अधिवेशन
सध्या विधिमंडळाच्या दोन्ही सभागृहाला विरोधी पक्षनेते नाहीत. १५ वी विधानसभा स्थापन झाल्यापासून २२ जुलैपासून सुरू होणारे अधिवेशन हे सातवे अधिवेशन आहे. सलग सात अधिवेशनात विधानसभेच्या विरोधी पक्षनेतेपदाबाबत निर्णय होऊ शकलेला नाही. विधान परिषदेत शिवसेना ठाकरे गटाचे नेते अंबादास दानवे यांची सदस्यत्वाची मुदत गेल्या वर्षी ऑगस्ट महिन्यात संपली. तेव्हापासून विधान परिषदेतील विरोधी पक्षनेतेपद रिक्त आहे. सत्तारूढ पक्षाची भूमिका पाहता या अधिवेशनातही विरोधी पक्षनेता निवडला जाण्याची शक्यता नाही.