म. टा. प्रतिनिधी, पुणे: भारतीय जनता पक्षाच्या संभाव्य उमेदवारांची नावे निश्चित करण्यात आली असून, मुख्यमंत्री देवेंद्र फडणवीस यांच्या उपस्थितीत त्यावर अंतिम मोहोर उमटवली जाणार आहे. आमदार, माजी आमदार, माजी खासदार यांच्या कुटुंबीयांकडूनही उमेदवारी मागितली आहे. ‘सर्वसाधारण’ गटाचे एकच आरक्षण असलेल्या प्रभागांत इच्छुकांची संख्या जादा असल्याने उमेदवार निश्चिती करताना तिढा निर्माण झाला आहे. या पार्श्वभूमीवर फडणवीस यांच्या उपस्थितीत आज, गुरुवारच्या बैठकीत त्यावर निर्णय घेतला जाणार असल्याचा दावा सूत्रांनी केला.
भाजपच्या कोअर कमिटीची बुधवारी आपटे रस्त्यावरील एका हॉटेलमध्ये रात्री उशिरापर्यंत बैठक सुरू होती. या बैठकीसाठी उच्च व तंत्रशिक्षणमंत्री चंद्रकांत पाटील, केंद्रीय राज्यमंत्री मुरलीधर मोहोळ, नगरविकास राज्यमंत्री माधुरी मिसाळ, शहराध्यक्ष धीरज घाटे, प्रदेश सरचिटणीस राजेश पांडे, आमदार सिद्धार्थ शिरोळे, सुनील कांबळे, माजी मंत्री दिलीप कांबळे, पुण्याचे निवडणूक प्रमुख गणेश बीडकर उपस्थित होते. या बैठकीस टप्पाटप्प्याने आमदारांनी हजेरी लावून त्यांच्या मतदारसंघातील संभाव्य उमेदवारांच्या नावांवर चर्चा केली.
Supriya Sule यांचं अजब वक्तव्य, म्हणाल्या, ‘तुम लोग को डबके में रहने का बहोत शोक है’
पाटील आणि मोहोळ यांनी शहरातील सर्व आमदारांसोबत चर्चा करत त्यांच्या विधानसभा मतदारसंघांतील उमेदवारांवर सविस्तर चर्चा केली. ज्या नावांवर संघटना आणि आमदारांचे एकमत झाले, अशा उमेदवारांची नावे निश्चित केली आहेत. काही प्रभागांमध्ये आरक्षणामुळे उमेदवारी कोणाला द्यायची, याचे प्रश्न उपस्थित झाले आहेत. त्यात प्रामुख्याने सूस-बाणेर-पाषाण, औंध-बोपोडी, बावधन-भुसारी कॉलनी, शंकर महाराज मठ-बिबवेवाडी, मुकुंदनगर-सॅलिसबरी पार्क, शनिवार पेठ-महात्मा फुले पेठ, शिवणे-खडकवासला, बालाजीनगर-आंबेगाव कात्रज या प्रभागांचा विषय आहे.
भाजपकडून लढण्यासाठी मोठ्या संख्येने इच्छुकांनी भाजपकडे अर्ज दाखल केले आहेत. त्यामुळे प्रभागात ‘सर्वसाधारण’ आरक्षण असलेल्या बहुतांश प्रभागांमध्ये एकापेक्षा अधिक उमेदवारांकडून तिकीट मिळवण्यासाठी सर्व शक्ती पणाला लावली आहे. अशा प्रभागांमध्ये एका प्रमुख उमेदवाराला आपल्या कुटुंबातून महिलेला उमेदवारी द्यावी लागणार आहे. त्यासाठी संबंधितांना राजी करण्यासाठी स्थानिक नेत्यांना प्रयत्न करावे लागत आहेत. काही उमेदवारांची नाराजी तर थेट मुख्यमंत्री फडणवीस यांनाच दूर करावी लागणार आहे.
भाजप प्रवेशाचा तिसरा अंक
भाजप प्रवेशाचा तिसरा अंक पार पडणार असून, शहर काँग्रेसमधील एका बड्या नेत्याचा प्रवेशदेखील अपेक्षित आहे. हा प्रवेश आज, गुरुवारी मुंबईत होण्याची शक्यता वर्तविण्यात येत आहे. या प्रवेशासाठी मुख्यमंत्री देवेंद्र फडणवीस; तसेच प्रदेशाध्यक्ष रवींद्र चव्हाण यांची उपस्थितीची आवश्यकता व्यक्त होत आहे. या नेत्यांच्या उपलब्धतेनुसार हा प्रवेश होणार असल्याचे सूत्रांनी सांगितले.
Pune News: वडिलांची भेट घेतली, भावाला फोन केला आणि पत्नीला ‘तो’ निरोप देऊन मंगेशने घेतला कायमचा निरोप, पुणे हळहळलं!
आमदारांना घरात हवी उमेदवारी
नगरविकास राज्यमंत्री माधुरी मिसाळ यांच्या कुटुंबातून दोन ठिकाणी उमेदवारी मागण्यात आली आहे. त्यांची भावजय माजी नगरसेविका मानसी देशपांडे; तसेच मिसाळ यांचे चिरंजीव करण हे वेगवेगळ्या प्रभागांतून लढण्याच्या प्रयत्नात आहे. खडकवासला विधानसभा मतदारसंघाचे आमदार भीमराव तापकीर यांना त्यांचे पुतणे अभिषेक यांच्यासाठी उमेदवारी हवी आहे. त्याच वेळी तापकीर यांच्या भावजय माजी नगरसेविका वर्षासुद्धा निवडणुकीच्या रिंगणात असतील. आमदार सुनील कांबळे त्यांच्या मुलीसाठी उमेदवारी मागत आहेत. आमदारांना आपल्या नातेवाइकांसाठी; तसेच जवळच्या कार्यकर्त्यांसाठी उमेदवारी हवी असल्याने काही जागांवर तणाव आहे. सर्व तिढा फडणवीस यांच्या कोर्टात सुटेल, अशी टीका ‘कोअर कमिटी’तील सदस्यांनी केली.
लेखकाबद्दलकिशोरी तेलकर किशोरी तेलकर, महाराष्ट्र टाइम्स ऑनलाईनमध्ये ३ वर्षांपासून कन्सल्टंट म्हणून कार्यरत आहे.या आधी सकाळ मिडियामध्ये २ वर्ष कामाचा अनुभव आहे. चालू घडामोडी, गुन्हेगारी, राजकीय विषयांच्या बातम्यांत विशेष आवड.… आणखी वाचा