डंपरच्या धडकेत तरुण ठार

महंमदवाडी येथील रहेजा विस्टा रस्त्यावर सोमवारी सायंकाळी साडेचारच्या सुमारास लावंण्या हॉटेलसमोरील रस्त्यावर शिवशंभू महादेव मंदिराजवळ अपघात झाला. यात हमजा इमरान सरकार (वय २०, रा. पुणे) असे मृत्यू झालेल्या तरुणाचे नाव आहे. त्याचा मित्र केस वसीम खान (वय २०, रा. एनआयबीएम, कुबेरा गार्डन, कोंढवा) गंभीर जखमी झाला असून, त्याच्यावर रुबी रुग्णालयात उपचार सुरू आहेत.

काळेपडळ पोलिसांनी दिलेल्या माहितीनुसार, हमजा आणि केस हे दुचाकीवरून रहेजा विस्टा चौकाच्या दिशेने जात होते. त्या वेळी डंपरने त्यांच्या दुचाकीला जोरदार धडक दिली. यात हमजा याचा जागीच मृत्यू झाला, तर केस याला उपचारांसाठी रुग्णालयात दाखल करण्यात आले. पोलिसांनी संबंधित डंपर ताब्यात घेतला असून, चालकाविरोधात गुन्हा दाखल करण्याची प्रक्रिया रात्री उशिरापर्यंत सुरू होती.

Nashik Crime : तुझ्या नवऱ्याला तू आवडत नाहीस… डॉ मनिषा जेजूरकर मृत्यूप्रकरणी पतीनंतर डॉ स्वाती चव्हाणलाही अटक, लग्नबाह्य संबंधांचा आरोप

कामावर जाताना अपघात

हडपसर उड्डाणपुलावर सोमवारी सकाळी साडेसहाच्या सुमारास सासवड रस्त्यावरून हडपसरच्या दिशेने मुख्य उड्डाणपुलाला जोडणाऱ्या रस्त्यावर अपघात झाला. यात गणेश दत्तात्रेय वाघमोडे (वय २२, रा. भोसले व्हिलेज, फुरसुंगी; मूळ गाव सातारा) असे मृत्यू झालेल्या तरुणाचे नाव आहे. गणेश मगरपट्टा परिसरात कामाला जात होते. नेहमीप्रमाणे सोमवारी सकाळी ते दुचाकीवरून कामासाठी निघाले होते. अज्ञात वाहनाने त्यांच्या दुचाकीला धडक दिली. धडकेनंतर वाहनाचे चाक गणेश यांच्या अंगावरून गेल्याने ते गंभीर जखमी झाले.

अपघातानंतर ते रस्त्यावर रक्ताच्या थारोळ्यात पडले होते. घटनेची माहिती मिळताच वाहतूक पोलिसांसह सामाजिक कार्यकर्ते प्रशांत सुरसे आणि नीलेश म्हैसाने यांनी घटनास्थळी धाव घेतली. त्यांनी गणेश यांना उपचारांसाठी ससून रुग्णालयात दाखल केले. मात्र, डॉक्टरांनी त्यांना मृत घोषित केले. गणेश यांचे आई-वडील आणि भाऊ मूळ गावी राहतात. कामानिमित्त ते पुण्यात मोठ्या बहिणीकडे राहत होते. अपघातामुळे हडपसर उड्डाणपुलासह पुणे-सोलापूर रस्ता आणि हडपसर-सासवड रस्त्यावर काही काळ वाहतूक कोंडी झाली.

BMW Car Crash : सनरुफमधून एक मित्र उडाला, थरथरणारा आदित्य, BMW कार हवेत उडून कोसळली, अपघातानंतरचं पहिलं दृश्य काय होतं?

विवाहाच्या तोंडावर आयटी इंजिनिअरचा मृत्यू

लोहगाव येथील निंबाळकर रस्त्यावर समोरून आलेल्या भरधाव दुचाकीने दिलेल्या धडकेत ३० वर्षीय आयटी इंजिनीअर सौरभ अनंत शेलार (रा. धानोरी जकात नाका, लोहगाव) यांचा मृत्यू झाला. रविवारी दुपारी साडेबारा वाजण्याच्या सुमारास हा अपघात झाला. सौरभ येरवड्यातील एका आयटी कंपनीत नोकरीला होते. रविवारी ते बुलेटवरून जात असताना निंबाळकर रस्त्यावर समोरून आलेल्या भरधाव दुचाकीने त्यांच्या दुचाकीला जोरदार धडक दिली.

या धडकेत सौरभ खाली पडले आणि त्यांच्या छातीला गंभीर दुखापत झाली. अपघातानंतर संबंधित दुचाकीचालक घटनास्थळावरून फरार झाला. स्थानिक नागरिकांनी सौरभ यांना तातडीने खासगी रुग्णालयात दाखल केले. मात्र, उपचार सुरू असताना सायंकाळी त्यांचा मृत्यू झाला. सौरभ यांच्या पश्चात आई-वडील, मोठा भाऊ आणि बहीण असा परिवार आहे. येत्या नोव्हेंबरमध्ये त्यांचा विवाह होणार होता. त्यामुळे कुटुंबात विवाहाची तयारी सुरू असतानाच अपघाती मृत्यू झाल्याने शेलार कुटुंबावर दुःखाचा डोंगर कोसळला आहे.