राज्य निवडणूक आयोगाने जाहीर केलेल्या निवडणूक कार्यक्रमानुसार महापालिका क्षेत्रांमध्ये २३ डिसेंबरपासून उमेदवारी अर्ज भरण्यास सुरुवात होणे अपेक्षित होते. पहिल्याच दिवशी उमेदवारी अर्जांसाठी झुंबड उडेल अशी अपेक्षा व्यक्त केली जात होती. मात्र, महायुती आणि महाविकास आघाडीतील सर्वच घटक पक्षांकडून युती आणि आघाडीसाठी जागावाटपाची चर्चा पूर्ण झालेल्या नाहीत. परिणामी पहिल्या दिवशी एकाही बड्या उमेदवाराने अर्ज सादर केला नाही. जागावाटपाच्या गुऱ्हाळामुळे इच्छुकांमध्ये संभ्रमाचे वातावरण आहे.

राजकीय भूकंपाचा केंद्रबिंदू ठरलेल्या शहरात शिंदेसेनेचा सूर एकाएकी बदलला; भाजप काय करणार?

आपापल्या पक्षधुरिणांकडे त्यांचे डोळे लागले आहेत. यात प्रामुख्याने महायुतीतील शिवसेना आणि भाजपच्या उमेदवारांचाही समावेश आहे. महायुतीच्या जागावाटपाची चर्चा सुरू असून मंगळवारपर्यंत १५० जागांपर्यंतच निर्णय झाल्याचे सांगितले जात आहे. त्यामुळे इतर ७० हून अधिक जागांबाबत निर्णय न झाल्याने अनेकांच्या युती आणि आघाडीच्या अंतिम जागावाटपाकडे लक्ष लागून राहिले आहे.

ठाकरेंच्या युतीची आज घोषणा

हिंदी सक्तीच्या मुद्द्यावरून शिवसेना उबाठा पक्षाचे प्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे हे एकत्र आले होते. त्यानंतर आगामी मुंबई महानगरपालिका निवडणुकीसाठी हे दोन्ही बंधू एकत्र येणार असल्याचे जवळपास निश्चित मानले जात होते. त्यानुसार आज, बुधवारी दुपारी हे दोन्ही नेते संयुक्तरित्या पत्रकार परिषद घेऊन यासंदर्भातील घोषणा करणार आहेत.

काँग्रेसची यादी २५ डिसेंबरनंतर

मुंबई महापालिका निवडणूक स्वबळावर लढण्याची काँग्रेसने घोषणा केली असली तरी नेमक्या किती जागा लढाव्यात, याबाबत पक्षाचा अंतिम निर्णय झालेला नाही. दुसरीकडे इंडिया आघाडीतील घटक पक्षांना सोबत घेण्याची तयारीही काँग्रेसने सुरू केली आहे. उमेदवारांची यादी निश्चित करण्यासाठी स्थापन केलेल्या छाननी समितीची २५ डिसेंबरनंतर बैठक होणार आहे.